莫可欣囡囡恨有伴 方中信Say No
方中信太太莫可欣昨日出席活動時透露，女兒符迦晴近日心願是希望有弟妹作玩伴，但卻被方中信當面拒絕。她又自嘲是「老蚌生珠」，無論年紀及環境也未能配合成其好事。
方中信太太莫可欣昨日帶同女兒符迦晴（方中信原名符力）出席兒童慈善活動，同場還有名媛楊張新悅、名模趙嘉懿、藝人林曉峰與太太康子妮和姚嘉妮等。眾星向在場人士分享不少「湊仔經」。可欣表示雖然早前成功為迦晴報讀鄰近屋企的國際小學，但仍希望女兒能多學中文：「每日都要佢抄中文，之前學校教中文都教得好，但佢講中文時仲有啲外國口音，因為我哋係中國人唔可以唔識中文。（聽話？）佢可能未必非常突出，但OK幾乖，學校老師都幾鍾意佢。」
楊張新悅B女好易湊
可欣又自爆日前被迦晴要求生B作玩伴，但卻慘被丈夫請食檸檬：「我叫個女問佢爹哋。（咁方中信點答？）佢話NO！（想還個女心願？）依家生咪老蚌生珠，都生唔出，自己都算高齡，其實環境同年紀唔係咁易配合。（綁老公喺床再努力？）唔使綁佢都會喺床打機，佢係宅男。佢今日都返大陸拍劇，要留兩個幾月。」
同場的楊張新悅指細女出生剛好五個多月，已非初為人母的她指好易湊，現在每時每刻也掛念三名愛女，又自言非常貪心：「想做好媽咪、好老婆同有事業，所以都幾分心，身體狀態暫時可以，但其實直情唔夠瞓。」
Cara G.口味變疑佗仔
此外，現懷有第二胎的混血名模Cara G.同日出席海洋公園的保育活動，表示已懷孕近五個月，預產期是今年七月，但暫仍未知BB性別。她指朋友和家人也覺得今胎是佗仔，因飲食口味有所改變，Cara謂：「懷上一胎好容易，反而今胎三個半月仲嘔，又入院兩次。本身我係素食者，今胎嘗試食少少肉，但生完會再食番素。今胎好鍾意飲橙汁，以前明明唔鍾意，又突然好鍾意食鹹嘢。」有感香港養育子女不容易的她，坦言未有考慮停工待產，最近更忙於計劃開設網站，除出售自家嬰兒品牌外，亦會以博客身份撰寫關於健康及孕婦菜譜。
文：名人組