嘉穎肉搏楊怡通頂谷肌
鄭嘉穎、楊怡、林夏薇及楊秀惠等昨日現身旺角行人專用區，為無綫新劇《天眼》宣傳，更派波板糖給市民。忙於拍另一新劇《殭》的嘉穎，在昨早收工後到場，他說：「日日都大通頂咁拍。」他表示因配合角色需要，已瘦了8至10磅，又笑言瘦到「朱古力（腹肌）都返晒嚟」，問會否趁機晒肌？他說：「唔會無端端拎出嚟，唔係特登練，係『副作用』。」
嘉穎透露在《天眼》與楊怡有感情線，第一集已有火辣鏡頭，問拍攝當日楊怡男友羅仲謙有否監場？嘉穎謂：「冇，我哋信任對方，拍之前會溝通好，好順利同冇意外。」
唔做羊年新娘
楊怡與家人新年時到沙巴旅行，由於與謙仔未夾到時間，所以致電謙仔父母拜年。有指楊怡將做羊年新娘，她笑謂：「我屬羊、又姓楊，唔使做羊年新娘啦。」《天眼》與謙仔演的《衝線》同期播出，問楊怡會否擔心搶收視？她說：「叫咗佢唔使留力，希望收視我高啲！」演女警的林夏薇買了假槍在家對鏡練習，她笑指半夜大叫「咪郁」嚇到愛犬。
文：影視組