君如力捧王菀之衝擊影后
吳君如與王菀之到戲院為新片謝票，演而優則監（製）的君如繼金雞及金鴨後，再有新諗頭，打算食「撞人麒麟」熱，欽點愛將王菀之演出武打動作片《12麒麟臂》，讓王菀之當上麒麟英雌大肆撞人，君如揚言誓捧Ivana角逐明年的「最佳女主角」。
吳君如和王菀之（Ivana）前晚到觀塘戲院為賀歲片《12金鴨》謝票，順道慶祝票房衝破二千萬，又向觀眾大派金鴨「Tea-Bag」（茶包）。戲中大騷事業線的Ivana，獲影迷當面讚身材正。
羨慕身材似包米
君如由美國西岸結束假期返港，她說：「去咗成個星期，時差咗四日，好心急返嚟，根本冇放假，心掛掛票房，每日拍兩條片返嚟播。（你戲中反串，出年角逐男主角？）我原本諗住報女主角，但我係男人嚟喎！（為Ivana報女主角？）王菀之攞咗今年先，出年開套動作武打賀歲片《12麒麟臂》，捧佢做女主角，佢梗係做撞人嗰個啦，我有能力梗捧佢。」並羨慕Ivana身材勁：「嗰日見到佢『包米』我都呆咗。」
「下半生靠你」
Ivana聞得獲君如力捧表示：「我下半生靠你喇！聽到『捧』字我就定喇，多謝，但我好重o架喎，依家冇一件衫着得落。觀眾都話我肥，我解釋係要有老闆娘氣勢。我打算七個星期唔食嘢，等塊面削番啲。（君如讚你『包米』勁，男友都好冧你身材？）暫時未嫌棄。」君如則稱：「邊有男友鍾意洗衫板？我嗰個就鍾意手腳瘦，但要有『包米』！」
文：影視組