黃智賢 姚子羚 紅燈夫妻心有靈犀

黃：黃智賢 姚：姚子羚 記：記者

初次合作　毫無隔膜

姚：其實我一直唔覺阿Ben（黃智賢洋名）係前輩，呢個係最舒服嘅地方。如果我同佢演夫妻，將前輩形象放喺我腦裏面，一定會有隔膜。

黃：我咁幼嫩，又鍾意傻吓傻吓，唔會有前輩嘅面口。

姚：阿Ben係一個好對手，大家傾到劇入面最難忘嘅場口，我哋都不約而同諗起同一場冇對白嘅戲。

黃：場戲係講我最失落嘅時候，突然見到子羚出現，大家對望後緊緊相擁。其實係大家拍劇投入角色，累積咗感情，喺場對望嘅戲特別有感情，都係大家冇夾過嘅默契。

子羚坦言若能遇到好夾嘅人生伴侶，絕對係天賜。

黃智賢細心體貼，對子羚照顧有加，但原來他亦曾玩世不恭。

求愛大過天　尊重要行先

黃：愛情係成個生命嘅滋潤，人生已經好多苦，如果人冇咗愛就冇晒動力。

姚：不過愛同愛情唔同，我都覺得「愛」好重要。你努力去工作，可能為咗夢想，或者屋企人。女人都鍾意被愛，以前我會覺得愛情佔好大部分添，因為愛情係開心，同你講「BB豬，un咕咕，想食咩吖？」（大笑）

黃：你嗰啲叫「疼愛」，永遠都係吸收。愛有分好多種o架，苦戀都係愛，愛情太複雜啦。「愛」好大同，對一花一草都可以愛。但係愛情係自私，我淨係想對你好，或者淨係想你對我好，男人初初可能唔明o架！

記：你好明白？

黃：吓！我盡量淨係畀佢知道佢係最特別！（大笑）我試過將太太當係朋友咁對待，冇將佢放喺第一位就衰咗啦！好似約朋友食飯前，要問咗佢先，唔好應承咗朋友先通知太太，尊重同先後次序好重要。

姚：女人好小器o架，其實唔係介意對方問唔問先，而係想知對方心裏面有冇自己。我唔係樣樣都要對方問，不過去Party、重要聚會，都會諗：「做咩唔叫我一齊去吖？」你問咗我，我唔去係一回事，而唔好直接唔問我。要遇到人生伴侶唔容易，搵到一個好夾嘅人，係天賜。

姚子羚、黃智賢	黃智賢與姚子羚首演夫妻，默契程度一拍即合。	子羚笑言黃智賢從不會有前輩面口，二人對戲毫無隔膜。

男女大不同 Timing至緊要

姚：劇入面都講盡男女感情世界，喺我愛情觀入面，我想要一個有閱歷、有主見嘅男人，可以帶住我去進步。加上我比較男仔頭，有自己諗法，有時會因為雙方有唔同嘅價值觀而鬧交同有分歧。其實男人想女人小鳥依人，我又何嘗唔想對方溫柔啲？都係要大家磨合。

黃：磨合好緊要，我同太太就逐漸包容對方嘅缺點，唔需要對方改變。其實男女諗法唔同，女人嘅浪漫就係適當timing做適當嘅事，日日為佢擔遮會令佢覺得好煩，不過打風落雨去為佢擋雨，凍嘅時候畀個擁抱就Sweet啦。

姚：其實男人都一樣，都唔會想個女人日日問佢：「你幾時返嚟？做嘢做成點？」可能返到屋企擺碗湯喺枱面，已經好warm。啱timing就得，唔使日日Keep住做。

黃：兩個人相處耐咗，之間嘅默契真係盡在不言中。但係又唔可以話心照不宣，幾時需要暢所欲言，幾時要靜一靜，呢個係相處嘅藝術。

記：你嘅相處藝術如何？

黃：（大笑）我學咗好耐先講得出o架。因為我同太太由細識到依家，以前周圍玩不停搵節目，到依家想要安靜又黐家。其實兩個人玩吓狗、煮吓飯、睇電視已經好Sweet。

姚：我都學緊。如果遇到愛嘅人，自然想為對方改變，去接受對方嘅缺點。好似阿Ben兩公婆，互相包容。可能唔識洗衫煮飯，去學囉！

黃：我係接受咗佢（老婆）唔識洗衫煮飯啦，哈哈。已經接受佢嘅強項唔喺呢方面，每個人都各司其職，唔會怨佢唔洗碗，由得佢先，等工人嚟洗咪得囉。唔好試圖改變佢，其實兩個人性格可以唔一樣，但係價值觀要相同。

後記：

訪問當日凍得騰騰震，二人更要在戶外食住北風影相。Ben哥即發揮大哥精神，化身姚子羚的臨時助手，先叫子羚在室內地方取暖，Set好機可以影相，Ben哥才呼喚子羚埋位。見子羚凍到口震又起雞皮，Ben哥哥又掏出暖手袋給對方取一絲短暫的溫暖，最後再「萬歲」請飲熱咖啡，窩心至極！而子羚就算腳踏五吋高踭鞋，都照樣爬高爬低影相，兩個字「專業」！

文：黃宛婷

攝：張福宏

髮型：Taylor Wan＠Hair corner

化妝：Sammy Lam＠Gardenia

服裝：Caxx carash