陳茵媺讚細仔似陳豪：好英俊
索爆媽咪陳茵媺（Aimee）大前日順產誕下幼子Nathan Lucas，昨日在老公陳豪陪同下會見傳媒，兩人十指緊扣又咀嘴晒恩愛，她更大爆「Second Prince」似足陳豪：「細佬好英俊、好man！」Aimee抱着細仔出院時以絲巾包到冚，回家後卻將BB靚仔相上載，母子鼻掂鼻溫馨滿瀉！
陳茵媺（Aimee）昨日在陳豪陪同下於嘉諾撒醫院會見記者，宣布上周四（26日）下午順產誕下幼子Nathan Lucas，架墨鏡的Aimee與夫十指緊扣，陳豪更突然sweet爆咀她，兩人又甜蜜咀嘴！已是兩任媽咪的Aimee依舊面尖尖、手腳纖幼，「廿四孝老公」陳豪如服侍女王般，全程扶到實，又搬櫈讓她坐下休息，無微不至。
天賜的禮物
Aimee說細仔約重6.13磅，中文名未改，英文名為Nathan Lucas：「Nathan代表上天賜嘅禮物，Lucas就代表發光發熱、天上嘅星星。」而今次生產過程比第一胎更痛、更辛苦，幸當日上午作動入院，五小時便順利誕下BB，暫時長子陳梓燁未見過細佬。兩人又指細仔似爸爸，大仔似媽媽，Aimee更兜圈讚老公說：「細佬好英俊、好man！」陳豪也搞笑補充：「又係個靚仔。」
他倆更心意相通地決定再追，陳豪說會讓太太先作休息，之後才進行「造人」大計，是否想追女？他說：「小朋友是天賜嘅禮物，如果上天賜冇理由唔要，多啲嚟密啲手，咪畀心機做嘢囉。」Aimee直言小孩是動力，令他倆更畀心機工作，由於她想親手照顧兩個兒子，但她又喜歡拍劇，故希望兩樣可以取得平衡：「小朋友大得好快，大仔十四個月已經同細佬好大分別，好想享受同見證佢哋長大過程。」居於多倫多的Aimee父母下周會返港見孫仔。
晒母子萌照
下午近二時，Aimee手抱以絲巾由頭包到落腳的BB出院，在丈夫及陳豪胞兄開路下登車離去，「Second Prince」Nathan Lucas的靚仔樣未有曝光！不過稍後Aimee在微博上載熟睡的Nathan Lucas萌照，鼻高高的他與媽咪鼻掂鼻合照，溫馨非常！
文：影視組