發哥 張家輝勢拍《賭城III》

由周潤發及張家輝等主演的賀歲片《賭城風雲II》票房報捷，截至2月27日為止內地票房已超過6億人民幣，而香港、內地和馬來西亞票房至今總共約8億港元，電影公司料該片未來10億票房在望！台前幕後昨晚在港舉行慶功宴，筵開30多席娛賓，場面熱鬧。導演王晶及監製劉偉強被問到是否會開拍《賭城風雲III》時，王晶說：「過10億就開啦。」劉偉強則答：「應該係啩！」看來拍第三集勢在必行。

想拍「硬嘢」槍戰戲

身為女主角的劉嘉玲因離港關係未能現身，慶功宴交由發哥及家輝主持大局，兩大型男孖住上接受記者訪問大放笑彈。談到威水票房，發哥即謂：「都係託張師傅（家輝）鴻福啫。」家輝即答：「嘩，我之前驚自己搭沉船喎。」

問到家輝會否繼續接拍賀歲片？他說：「傾緊嘞。（再同發哥合作？）我想同佢拍啲『硬嘢』，江湖片就好嘞。」發哥聞言即表示：「我冇攞槍好耐嘞。」

發哥與太太陳薈蓮恩愛到場。	（左起）蔡一智、姜皓文和蔡一傑在台下睇到興奮手指指。	《賭城風雲II》票房厲害，台前幕後齊齊舉杯慶功。

笑幫家輝湊關詠荷

家輝指日前偕太太關詠荷入場：「佢睇到發哥眼都唔眨呀。」發哥搞笑答道：「你交老婆畀我，你放心去拍戲啦。你老婆行唔行山呀？我幫你湊啦，梁朝偉都交咗劉嘉玲畀我，呢啲嘢我做慣嘞，不過關二哥最叻係咩吖？」家輝答：「勾義嫂囉。」發哥道：「你咪陷我於不義呀！」令全場忍俊不禁。發哥又透露全晚有高達80萬的抽獎，家輝說：「我人工咁低，抽到一定唔會攞番出嚟。」

文：影視組