黃翠如背蕭正楠攬靚仔Oppa

無綫藝人黃翠如、翟威廉、陳智燊及張曦雯獲韓國電視台邀請，到首爾拍攝由韓國KBS、CMB有線電視台及TVB攜手打造的韓劇《七天的浪漫》。KBS有感上次與無綫合作《愛情來的時候》反應好，且為慶祝KBS 50周年台慶，故由KBS出製作費，TVB提供演員，拍攝5集劇集《七天的浪漫》，劇集會於港、韓兩地拍攝。

「每日瞓得兩個鐘」

翠如身為無綫非戲劇製作總監余詠珊愛將，之前有傳翠如沒劇拍被雪，現在傳聞不攻自破。今次她與韓國人氣男團god靚仔成員安信源（Danny）合演情侶，無綫為免她辛苦，替她推掉原本要泳裝落水的場口。而「翠如BB」雖與蕭正楠打得火熱，但鏡頭前奉旨攬仔卻全無避忌，拍海報時更與韓國Oppa依偎，翠如說：「呢度好凍，仲要喺雪地拍嘢，着到隻糉咁再貼暖包，但韓國人唔怕凍，Danny着一兩件衫就搞掂。（Danny份人點？）佢好Nice，我哋用英文溝通。起初有啲尷尬，因到埗第一日就拍親密戲，我哋由唔熟變到熟，之後場口就拍得順利！我用廣東話講對白，劇情交代Danny識聽，我就識講啲韓文。」

她又疑似隔空向男友撒嬌：「我一落機就拍嘢，都冇自由活動時間，每日瞓得兩、三個鐘，好辛苦！不過韓國Crew好專業，幾部機一齊拍，拍得好快！」雖然劇集暫定5月才播出，但韓國CMB電視台不停Update花絮，翠如更以廣東話談拍攝感受：「我飾演敢愛敢恨嘅專業攝影師，我同好多女仔一樣，感受過愛情嘅魔力，經歷過失戀嘅痛苦，我會將呢啲感覺投入番落角色度。」又讚Danny是值得愛的男人。

翠如與安信源捱冷在雪地拍浪漫戲。	蕭正楠	黃翠如、陳智燊、翟威廉、張曦雯合作拍韓劇。

蕭正楠痛心女友病

蕭正楠昨在電話談到女友與韓男拍劇攬得好緊，他說：「拍劇梗要拍到最好，咪叫佢當個男主角係我咪得囉！我哋日日聯絡，知佢作病，幾心痛佢，叫咗佢搵定藥食；我拍緊劇，冇時間探佢。」身在韓國的陳智燊說：「呢度仲凍過英國，我後悔冇帶暖包！」翟威廉則說：「劇中我做翠如助手，我識日文、韓文，都可以幫手做翻譯。」

文：影視組