周子駒帶愛犬拜年 博「雙封」
前無綫藝人周子駒（Cyrus）是愛犬之人，春節要向親友拜年，Cyrus帶同愛犬Henry去拜年，將牠扮得靚靚仔仔，又逗人歡喜，分分鐘逗「雙封」利是！
周子駒（Cyrus）在新歲前先帶愛犬Henry到寵物美容店扮靚仔，煥然一新過羊年，問Cyrus新年會否帶同Henry四處拜年？Cyrus笑言：「會o架，帶埋狗仔去拜年都會特別受歡迎，我仲可以同啲親戚朋友介紹呢個係我『囝囝』，咁仲可以逗埋Henry份利是添！」
冇約蒙嘉慧
Cyrus自細每逢農曆新年前都會行花市，問他還有甚麼新年難忘事？他憶起曾經發生過「爛桃花」事件：「成日話做呢行要買桃花，因為有助人緣，有一年我買一棵桃花返屋企，有人嚇我一定要連續買三年先得，我都唔記得買咗幾年，搞到我嗰年驚咗成年，自此我就唔再買桃花，費事又唔記得買咗幾年啦！」
問到今年農曆新年怎樣過？Cyrus說：「我年年新年都會去日本滑雪，一來我鍾意滑雪，二來其實娛樂圈新年嗰幾日都特別靜，不如去吓旅行。」往年他曾經邀請好友蒙嘉慧（Yoyo）一同去日本滑雪度歲，不過Cyrus表示Yoyo腳有傷患，今年應該約不成。他可有催好友Yoyo和老公鄭伊健早生個羊B？Cyrus說：「唔催喇，佢哋咁大個人自己決定啦！」
文：王庭芝
攝影：司徒國榮