杜汶澤點名 阿Sa破格演妓
杜汶澤（阿澤）為新片擔任監製，欽點蔡卓妍（阿Sa）夥拍任達華演出。他直言外界一直低估阿Sa的演技，今次要讓她好好發揮，令人對她刮目相看。對於阿Sa破格演繹爆粗和情慾戲，他直言對方演得逼真，好有真實感。
藝人杜汶澤為英皇電影《雛妓》擔任監製，邱禮濤執導，並找來蔡卓妍和任達華擔演。阿澤坦言是他欽點阿Sa演出，他說：「佢出道至今，予人感覺係細路女，其實佢個年紀、喺呢行打滾咗咁多年，成熟度足夠應付呢部戲，佢嘅心路歷程已經係大人。加上我覺得佢啲演技一直被外界低估，我覺呢部戲好應該用佢，畀佢發揮，我要畀人認識阿Sa。」問到阿澤為何不參與演出，他表示近年多參與喜劇演出，擔心觀眾誤會這一部是喜劇。
任達華有壓場感
阿澤表示這部戲決定用任達華當男主角，否則也開拍不成，他說：「因為佢外形恰到好處，我比較傳統，注重演員外觀，佢咁有型、又有演技，又夠壓場感。因為阿Sa未試過咁大膽演出，如果對手夠經驗，會畀到佢好大安全感。好多女藝人拍情慾戲會擔心被抽水，但任達華點會，佢拍床戲多過你拍戲啦。」
雖然戲中有不少粗口對白及情慾戲，阿澤謂不用說服阿Sa演，他說：「佢睇完劇本就應該估到點演，佢一直冇咁嘅機會遇到呢啲劇本，我覺得今次角色好啱佢做，佢餓戲餓過龍，一有呢啲機會一定會豁出去，依家大家畫面上見到嘅，都係我哋要求。」
最難過經理人關
阿澤又坦言說服其經理人霍汶希才是最困難的一關，他說：「經理人始終好保護藝人，會有好多顧慮。過佢呢關仲難過說服阿Sa。不過霍汶希都開通咗，我知佢唔係相信我，係相信導演啫，今次好感激佢放低咗，佢都係豁咗出去。」對於阿Sa爆粗的一幕，他說當時隔住道門聽，好似聽到隔籬屋有人鬧交咁，好真實。
化妝：小鬼
髮型：Ritz@Hair Corner
場地：Mira Moon Hotel
文：影視組