諸葛雄心壯志殺入東南亞

踏入新一年，諸葛紫岐（Marie）主力發展娛樂公司，正進行多個大計，她說：「電影及電視劇陸續進行中，亦會同網站合作，依家物色緊主角。（自己演出？）有啱嘅角色可能會客串，主角留番啲機會畀其他人。」Marie公司愈開愈多，更會開拓東南亞巿場，她說：「依家北京、上海、香港、新加坡都有公司，諗住嚟緊會發展東南亞巿場。」她又大讚呂晶晶和莊端兒有潛質：「佢兩個路線好唔同，晶晶較鄰家女孩、楚楚可憐，端兒身材好，係型格路線，又可以好性感、野性、打女feel，嚟緊都仲有幾個傾緊。」

分開搏殺感情佳

Marie將心思放在工作上，被問到老公薛嘉麟與一歲多的仔仔會否詐型？她笑說：「如果我長時間喺北京，都會帶埋囝囝去，咁唔一定要成日陪住，只要健康成長、快快樂樂就滿足。老公佢仲忙過我，我哋依家係搏殺期，（影響夫妻感情？）都結咗婚囉，如果真係有嘢發生，你都避免唔到，依家我哋冇乜嘢，佢又唔催我再生，如果催到時再諗。」

呂晶晶近年主攻大陸巿場，成績不俗，她大讚Marie：「佢思考能力好強，有任何嘢要佢做決定，佢好快就可以做到。」她透露最近拍了一套農村戲，拍攝過程很辛苦：「我第一次去啲咁鄉下嘅地方，好唔慣，當地仲有好多不知名嘅蟲，用蚊怕水都冇用，一定要搽當地嘅一種油，如果被咬中，就會腫晒，所以一定要包到自己實一實。」

晶晶希望兩年內嫁得出，更稱可以為家庭放棄事業。

（左起）莊端兒、諸葛紫岐和呂晶晶向本報讀者拜年。

莊端兒自我增值

至於莊端兒為裝備好自己進軍大陸巿場，不停自我增值：「平時睇好多唔同類型電影，跟住學做戲，同埋都有讀啲演藝課程，依家就好努力學國語。（行性感路線？）視乎劇本，可以性感，但唔想啲人只留意我嘅身材。」

服裝：（呂晶晶及莊端兒）希臘女神

場地：富豪香港酒店Alto 88

化妝：（諸葛紫岐）Krisie Wong、（呂晶晶）木子維納、（莊端兒）Florey Leung

髮型：（諸葛紫岐）Eve Chiu@Queen's Private i、（呂晶晶）Patrick So@Hair Corner、（莊端兒）Kaden Chan@Amour Hair Spa Salon

文：名人組