Lea T.被批生B 工作狂未ready
向來欣賞中國文化的斯洛伐克女模Lea T.，對農曆新年的傳統感到新鮮好奇，並處女下海揮毫炮製食字揮春，希望來年喜氣「羊羊」！Lea T.更自爆曾貪得意去睇相，怎料被批兩年後生B做媽咪，事業心重的她即大呼：「我未Ready！」
斯洛伐克女模Lea T.雖然是個如假包換的鬼妹仔，但對農曆新年傳統大感好奇，尤其見家家戶戶都會貼上揮春，更令她心郁郁要親自炮製玩食字的揮春！首次執起毛筆寫書法的Lea T.，即席揮毫時十分專注，她說：「原來揸毛筆好好玩，自己係第一次寫毛筆字，會keep番個揮春掛喺屋企。雖然中文字唔容易寫，但我覺得中文字好靚，相信練多啲會寫得靚啲！」
盼變得獨立
酷愛中國文化的Lea T.，原來也曾試過去拜會相士詢問運程，不過一問即大嚇一驚！Lea T.說：「以前去過睇相，佢話我27歲會有BB，即係兩年後就係！我聽到真係覺得好驚訝，因為我好喜歡現時嘅工作，冇諗過咁快要結婚生仔，我未Ready！我覺得自己仲係個小朋友，想變得獨立啲，同埋想為事業拚搏多啲先。我覺得工作中嘅女人好有魅力，相信都會易啲吸引男士！」
想學廣東話
Lea T.來港生活多年，身邊不乏香港朋友，因此早已識聽識講簡單的廣東話。她說：「有時做嘢，就算工作人員冇翻譯成英文，我都聽得明。其實聽咗咁多年，唔多唔少都聽得明少少，但我太怕醜，唔敢試講。」熱愛工作的她，更考慮搵老師學習廣東話：「我本身識講斯洛伐克語、德文同英文，自己都有興趣學廣東話，普通話可能會易啲，不過廣東話好聽啲。其實我仲識得點嗌叉燒飯『要半肥瘦叉燒飯』。」
文：專案組
攝：劉斌
場地：Tsang Siu Fai Studio