千嬅腳頭好發43萬新年財

楊千嬅與丈夫丁子高昨日攜同囝囝Torres現身馬場支持奶奶的愛駒「野孩子」出賽，丁子高與母親先到達，未幾千嬅拖着囝囝出現，並大方企定定合照，後來囝囝進場，千嬅表示趕着湊仔而未有接受訪問。另外，名媛鄺美雲（Cally）和「大美人」李嘉欣的丈夫許晉亨亦分別抵達馬場，為各自出賽的愛駒打氣。

丁子高唔再搭沉船

進馬場次數不多的千嬅一家三口腳頭很好，千嬅奶奶的「野孩子」最終以第一名跑出，一家興高采烈拉頭馬及贏得$433,200獎金！據知現年五歲的「野孩子」已有九次比賽經驗，戰績分別是摘冠兩次、奪亞軍和季軍各一次，累積獎金高達一百一十餘萬。丁子高及後接受訪問，表示自己首次入馬場跟母親拉頭馬，他笑說：「隻馬係媽咪同佢朋友嘅，已經贏過三、四次。我好少入馬場，因為我入親嚟都唔會贏，我媽咪頭先話我終於打破呢個宿命。（有冇落注？）我冇買，我由細到大買親次次都輸，費事搭沉船。」

丁子高母親的愛駒「野孩子」跑第一，千嬅與丁子高抱着Torres齊齊拉頭馬。

千嬅直擊「野孩子」跑出，興奮忘形。

問丁子高是否很有信心，才帶妻兒入場拉頭馬？他說：「Torres好鍾意馬，賽馬日佢喺屋企都要開電視睇馬仔，買咗好多馬嘅玩具畀佢，佢今日係第二次入馬場，隻馬跑緊時我哋嗌1號佢又一齊嗌，見隻馬跑第一佢就豎起拇指讚隻馬話No.1。（佢唔驚隻馬？）初時都以為佢會驚，拉頭馬時佢企隻馬隔籬，佢伸手去摸隻馬。我遲啲都會帶佢去探吓隻馬，畀佢餵吓隻馬。（會唔會畀佢學騎馬？）等佢大個啲先，五、六歲度如果佢想學都會畀佢學。」

千嬅與家人齊齊舉V慶祝。	蔣志光和韋綺姍獻唱，氣氛熱鬧。	鄺美雲為自己的愛駒打氣。

麥玲玲指點會生女

丁子高還透露在場內看見麥玲玲師傅時請教她自己會否再有第二個小孩及是否囡囡，他轉述說：「玲玲師傅話我有嘅，不過第二個都係仔，第三個先係女，生三個我接受到，但千嬅就同師傅話唔好玩我啦。」

許晉亨單拖入馬場。

何傲芝悉心打扮到場。

Cally亦到馬場為有份出賽的愛駒打氣，問到可有信心拉頭馬，她說：「唔知，希望啦，今日年初三攞頭彩。不過隻馬狀態幾好。（自己有冇落重注？）冇。」而藝人蔣志光與韋綺姍在馬場為賽馬日擔任嘉賓獻唱兩首合唱歌，問可會落注買馬？蔣志光自言不懂得買故不會買，韋綺姍則說：「我唔識，但會問吓屋企人，見佢哋有玩，會攞吓貼士。」

文：名人組