謝安琪捱通宵chur爆搵銀
謝安琪（Kay）近月大玩性感誘惑頻頻以透視裝亮相，已為人母的Kay昨日穿上透視長裙出席活動，由於內裏僅穿肉色迷你Tube Dress，令一雙白滑美腿若隱若現，難怪吸引一眾男士手持長鏡狂拍，識做的Kay獻唱期間更與一眾「K男迷」打招呼。
鄭嘉穎寡佬多女陪
Kay透露新年將放三日假，她說：「初一、二會同長輩拜年，初三就喺屋企同朋友玩，初四就要開工同鄭嘉穎拍劇。」問到情人節如何度過？Kay說：「會同嘉穎一齊拍劇，佢話自己孤身寡佬，同劇好多女演員陪佢一齊過。」
消瘦不少的Kay承認拍劇捱通宵：「尋晚（前晚）拍到今朝（昨晨）6點，瞓咗陣就要出席活動，錢從來唔易賺。」隨即提到老公張繼聰及仔仔張瞻，Kay說：「佢哋約咗去拍拖，剪頭髮同買衫，依家佢哋好注重造型，過幾日我就同佢去辦年貨同入利是。（追多個？）冇諗。」對於無綫劇集《殭》拍外景遭市民投訴，Kay說：「呢套好多打鬥場面費氣力啲，加上有啲拳風，所以有啲聲浪。」
文：音樂組