陳凱琳舞唔掂K-Pop
港姐出身的陳凱琳（Grace）可謂有樣貌、有智慧，但原來並非周身刀張張利！偏偏現時最流行的K-Pop舞蹈，對伊人來說是死穴，昨日她現身谷劇，透露拍新宣傳片時自暴其短，跳舞手腳不協調，自嘲要靠後期剪接搭夠，經過今次獻醜，已下定決心還是專心拍劇。
陳凱琳（Grace）、張繼聰、姚子羚等昨日於中環為新劇《四個女仔三個BAR》宣傳，為配合情人節，眾演員向在場市民派玫瑰花，當中亦吸引不少遊客索取兼合照，忙於拍攝新劇《殭》的Grace，透露今次比早前拍攝《張保仔》來得輕鬆，讓她能抽空為新年期間的工作做準備，日前更與《四》劇演員拍攝新宣傳片，不過此舉卻令Grace不慎獻醜人前。
街坊話熟口熟面
原來眾人要大跳K-Pop舞蹈，不過Grace自言跳舞不精，還出現手腳不協調，她謂：「我跳舞真係好渣，佢哋就好快上手，所以要靠剪接，我都係做戲好嘞！」談到《殭》劇於上環拍攝外景時被投訴擾民，Grace謂：「我之前都差啲畀人投訴，因為嗰度好靜，少少聲都好覺，不過啲人都好有禮貌叫我哋細聲啲，記得有朝拍到五點，有個叔叔開檔見到我，同我講好熟面口，話有睇劇。（會唔會想下次人哋叫得出你個名？）唔緊要，可能當日黑睇唔清啫！」
張繼聰（目及）妻談情
而張繼聰則透露老婆謝安琪忙於拍劇，更指沒興趣觀賞其談情戲，故至今一集也未有捧場，似乎醋味十足，他謂：「佢依家同鄭嘉穎夠每日談情，仲好鍾意佢，但我到時唔可以唔睇，因為佢會問我影評。」對於好友王祖藍婚禮在即，擔任兄弟團的他指雖然陣容強勁，但姊姊團也非人咁品，更謂：「我哋有林盛斌、視帝郭晉安，到時做番個奸樣，姊妹團仲唔叫救命。（祖藍喺網上呻畀人話佢婚禮吸金！）我都係過來人，當年我都畀人話慳搞啦！佢百毒不侵啦，唔好畀新聞影響心情。」
文：影視組