朱慧敏整撻 彭懷安焗包互氹
今日是情人節，情侶檔開餐廳的藝人朱慧敏（Queenie）和彭懷安（Eddie），日前互為對方獻出第一次，各自秘密學整愛心蛋撻及菠蘿包，為另一半送上驚喜，每個工序均落手落腳做，大呼不容易！Queenie試整店中王牌冇豬油蛋撻，笑言：「有啲雞手鴨腳！」
視Eddie為終生伴侶的Queenie，對於日前Eddie公布已求婚成功，感到非常甜蜜，還大爆難忘的浪漫片段：「有一次我拍戲受傷，佢嗰日已經開通宵，回家途中知道我受傷立即趕去醫院，然後安排跌打醫生，陪咗我成晚。佢食嘢時，第一啖同最後一啖都係留畀我。我唔鍾意食嘅，佢會為我食清光，我鍾意食嘅，佢就留畀我。」
至於Eddie就大讚女友慳家最令他感動：「呢一兩年嘅情人節都係喺屋企整嘢食，因為佢好慳家，佢話出去食貴喎！咁都幾sweet o架！」
