阿佘歐遊拖手香閨收花
貴為圈中筍盤的佘詩曼（阿佘）與古天樂（古仔），雖然度過多個單身情人節，但深信有心未怕遲，阿佘回憶曾為男友炮製愛心燭光晚餐時更一臉甜絲絲，不諱言在外國過情人節輕鬆得多，即使拖手亦零壓力，不過對當街拿住鮮花甚為抗拒。相反寡言的古仔卻保持神秘，透露冧女招數已於新片獻橋，並呼籲男士們可作參考！
佘詩曼與古天樂於新片《衝上雲霄》演「翻撻」情侶，當然愛得一發不可收拾，要幾甜蜜有幾甜蜜，兩人在昨日的《好報》B冊擔任封面情侶，分享對愛情的睇法，阿佘較古仔來得爽快，仍懷有一顆少女心的她，有感當藝人後私隱度大減，故憧憬情人節也要與男友到一個人煙稀少的地方過二人世界，她謂：「一定唔可以喺香港，歐洲囉，喺外國心情都唔同o架，其實冇咩特別嘢做，只係拖手出吓街都好sweet，呢樣嘢可能對普通人冇乜特別，但對我嚟講就好大件事。」
心形牛扒餵男友
對於女士們在情人節收花，阿佘笑指雖然喜歡，但卻以「型」作大前提，更謂：「唔好要我喺街度拎住紮花，之後返屋企送就得啦、（今年情人節點過？）好特別，就係飛去第二度宣傳套戲，有幾個型男機師陪我過。」回憶多年前的情人節，阿佘透露曾試過處女下海為男友煮心形牛扒，更花了一段時間籌備，她說：「我好細心o架，嗰餐好似喺餐廳食咁，有前菜沙律、蘑菇湯、主菜梗係心形牛扒啦！仲有埋甜品，朱古力蛋糕，全部係自己整o架！」雖然過程有出錯，但男友對其廚藝相當滿意。
獻橋摩天輪求婚
而向來低調處理感情事的古仔，其實也相當浪漫，為了新作《衝》片不斷向導演獻橋，如一幕於英國摩天輪下求婚戲，他竟突發奇想把摩天輪的圓形環當作求婚戒指，問到他有否試過以這招向女友求婚？古仔故作神秘說：「梗係唔話你哋知，總之我係深不可測，（咁大個仔做過最冧女嘅事係乜？）等嗰個人出現就知，如果男仔想抄橋就睇戲啦！」
文：影視組