王子涵招親 伍允龍被催婚

導演王晶愛女王子涵與多名愛將伍允龍、文凱玲、何浩文（Dominic）及唐紫睿（Hazel）趁新春將至，跟廚藝了得的小凌師傅學整湯圓，幾位百厭星玩到癲，武功高強的Philip以功夫搓麵粉，「塵土飛揚」嚇得Hazel急急避開，Connie則失手整散麵粉，反而細細個已有整湯圓的子涵手勢最好，而近期演「鴨王」的Dominic將麵粉搓成鴨形最有創意。

提到羊年大計，幾位藝人都希望在影壇有好成績，Dominic及Philip分別計劃執導及監製電影，Connie頭半年已有兩部片約，Hazel將參加長跑比賽，最近開始鍛煉體能，子涵主攻拍戲及Model工作，亦正努力學泰拳、功夫及唱歌增值自己。

伍允龍以功夫搓麵粉，場面搞笑。

文凱玲性感上陣，再烏低身搓湯圓，wow！

要過父親王晶一關

感情方面，Connie率先自爆勁Dry望拍拖，子涵則笑言要「比武招親」，但男友最緊要過其父親王晶一關，她笑說：「我冇一個男友佢（王晶）係滿意，有年帶個男友返屋企食團年飯，阿爸嫌佢太瘦，就同佢講『你要舉嘢喎！』另一次Philip同枱，阿爸叫佢騷腹肌，問我男友有冇呢啲，尷尬得嚟好搞笑！」至於已有緋聞女友鍾嘉欣的Philip被逼問何時結婚，他說：「適當時候會同大家講，會以好驚訝方法話畀大家知！」

何浩文將麵粉搓成鴨形，創意滿分。

（左起）唐紫睿、文凱玲、王子涵、伍允龍及何浩文互餵湯圓。

伍允龍服裝：izzue@i.t

場地：Cookology

文：影視組