唯唯眼疾好轉 安心擺50圍
梁烈唯上年年頭與太太Tina註冊，據知二人將於五月尾在洲際酒店豪擺五十圍婚宴，不過本報日前拍得唯唯到眼科專科醫生就醫，原來患眼疾的他早前經醫生安排下原本要做手術，但經覆診後，卻離奇好轉可待自然康復，放下心頭大石的唯唯坦言可安心籌備婚宴。
無綫藝人梁烈唯最近不時於內地登台密密賺，唯唯一直拚搏，原來都是想搵多點錢，用作五月尾於洲際酒店豪擺五十圍及用作買樓置業用，給太太及家人一個安全感。
奈何本報日前拍得他出現尖沙咀眼科專科診所，記者事後致電給他，唯唯坦言之前眼部不適，醫生安排到醫院做手術，所以要再去覆診，唯唯受訪時謂：「之前因為眼球入面黃斑位有水泡，要將畸形血管修正番，雖然醫生話有一定安全性，但手術始終有風險，不過尋日覆診時，醫生話依家情況可以唔使做，等佢自然好番，心情都好好多。」
唔畀錢阿Bob
現時唯唯放下心頭大石，說到他五月底豪擺婚宴五十圍，是否已賺到一大筆時，唯唯坦言：「絕對唔係搵大筆，都未有一舊錢可以買樓，賺到啲錢都要嚟擺酒、畀屋企，酒席好貴，不過我成日覺得人生最大的兩個party就係結婚同瓜老襯，所以點都要做好啲。」
至於伴郎，就請來兄弟袁偉豪，兄弟團就仲度緊，而司儀就請來阿Bob助陣。說到阿Bob又搶手又貴時，唯唯笑言：「我唔會畀錢佢喎！我淨係叫佢mark個期畀我咋！」
文：影視組