爆肌發哥加操貪靚

影帝周潤發前年為演好《賭城風雲》新賭神石一堅這角色，加上夥拍型男後輩謝霆鋒，令他矢志減磅，終成功由180多磅減至150多磅，身形變得輕盈成功回春。發哥在將上映的賀歲片《賭城風雲ll》中有場半裸打泰拳戲份，Trailer曝光後，所有影迷都被其結實肌肉「懾服」，驚歎他身形比不少後生仔更有睇頭！

少食多餐

發哥日前在北京接受《東網》專訪，他為戲中短短幾分鐘打拳戲而積極操肌，希望「真材實料」上鏡，當時磅數跌至150磅以下，肌肉條理更分明：「剛開工嘅時間已搵教練幫我做啲肌肉訓練、體能訓練啦！唔係點樣應付打兩日呀！（減磅同操肌，食嘢同運動方面有冇唔同？）食嘢不嬲都係少食多餐，但因為要肌肉，所以食番啲蛋白質，例如火雞肉、火腿、肉類，但都係白烚，冇咩味！（上鏡身形係咪滿意？）真人睇係瘦囉！上鏡啱o架喇，因為16比9，將個真人拉闊啲。（想肌肉再澎湃啲？）夠o架喇！唔好搞！一多過頭隻手就郁唔到，當時效果已非常好！拍完場戲，磅數小小回升番，如果冇工開嗰時就重番5、6磅啦！有工開可能又要操Fit，減番十磅八磅o架喇！（影迷擔心發哥瘦得滯！）出鏡好睇咪得囉，如果你見到好似好瘦，其實出鏡差唔多！如果你見到我差唔多，出鏡就肥o架喇！（最緊要上鏡靚？）一定要上鏡靚！」發哥笑言並非想練超爆身材，故訓練過程優悠自由，只需增多運動量及繼續行山：「做啲橡筋嘅訓練、掌上壓、下盤嘅工夫！全部都係『輕瓊』啲嘅，唔使舉鐵。」

周潤發笑言訓練過程很輕鬆。

周潤發操肌只為《賭城風雲II》數分鐘的打泰拳戲。

規矩剝衫

貴為巨星的發哥為何肯騷肌？他淡然笑說全因劇情需要：「打泰拳冇理由着晒衫打o架嘛！呢個係規矩！（場戲咁短，覺得大犧牲？）唔會，做演員咩都要試，就算唔拍戲都要鍛煉身體o架！（有咩趣事？）冇咩o架！上到台導演叫你郁，你就打打打到收工為止，不過好彩，佢唔會畀我打咁耐，打幾個鐘，就叫我收工第日嚟過。其實場戲係搞笑，唔似張家輝《激戰》咁打到砰砰嘭嘭，只係拎個Gimmick。（同家輝討論打拳同操肌？）戲入面佢係我師傅，教我點打點操，戲外就冇咩討論呢方面，搞笑戲最好唔好問咁多，佢認真起上嚟就唔似搞笑。」

上《東網》捕發哥

《東網》「捕獲發哥」專訪系列視頻，今天將推出的第5集，發哥會與大家分享他的喼Fit心得及爆肌歷程，大家不容錯過。