鄺美雲三年情玩完揀開心路行

現年52歲的鄺美雲（Cally），與55歲的恒基地產營業部總經理林達民（Thomas）拍拖三年。去年Cally在家開聖誕及除夕夜派對時，Thomas仍以男主人身份連踩兩晚。兩人上月10日亦孖住出席友人飯局，萬料不到，一個月間關係竟急轉直下，致分手收場。

嗌交多過食飯

據知兩人分手導火線，是因雙方性格強烈，嗌交多過食飯。昨日Thomas受訪時坦承分手：「其實都醞釀咗一段時間，緣聚就聚，緣散就散，自有安排。」雖然分手，但他仍大讚Cally是好女仔：「佢非常之有內涵，可能大家性格都好強，夾唔到就夾唔到。雖然可惜，希望佢搵到個更適合佢嘅另一半。（分手由誰提出？）和平分手，大家年紀都唔細，都冇乜機會拍多幾次，祝佢搵到個啱嘅settle down。（情人節才分手會否好寂寞？）邊有計算得咁盡。」

Cally於飯局上開金口與釗峰合唱《李香蘭》。	兩人上月出席飯局時，仍笑容滿面玩自拍。	鄺美雲與林達民一向恩愛，卻突然驚爆分訊。

情人節多人約

至於近日患上感冒的Cally，亦大方回應分訊：「我哋做番朋友，無唔開心，揀番開心嘅路行。（幾時分開？）係呢排，反正分開咗，唔想講太多，要向前行。（情人節前夕爆分手會否寂寞？）情人節好多朋友約我，我叫佢哋唔使特別約。本來就多約會，日日走好多場，不過我未決定去邊，可能到時返屋企休息都未定。」她又笑言未來工作很忙，暫不想感情事：「始終拍拖要時間，我日日做嘢都無時間。（Thomas祝福早日找到另一半？）我唔急呀，人好多使命，唔一定要愛情，可以將愛放喺幫人身上。」

而Cally的乾弟時裝設計師何國鉦表示，原定農曆新年一同遊泰國，前日才獲悉二人分手，問到有否見過林達民鬧情緒？他坦言兩人性格都強，唔可以稱之為脾氣，林生對朋友好好。

文：名人組