發哥歡迎「捕獲」冧fans自拍
【陳偉立北京直擊】神級影帝周潤發近年強勢回歸香港影壇，去年主演的賀歲片大收旺場，隨着新作《賭城風雲II》賀歲，最近掀起一股「捕獲野生發哥」熱潮，全城市民網上鬥晒集郵「戰利品」，並寫下與發哥合照的high爆感受！日前《東網》記者遠赴北京專訪發哥，他歡迎被fans「捕獲」：「你哋繼續捕捉我啦！我繼續走啦！」他又自爆成為「自拍（selfie）神」的秘訣！《東網》將連續多日「捕獲」不同「形態」的發哥，萬勿錯過！
親民影帝周潤發所到之處總是被大班fans包圍要求合照，他亦來者不拒，更會自動波拿起fans的手機，拍下讓對方畢生難忘的自拍照，有傳發哥在某慶功宴上被數百人排隊索合照，相信這兩年間他按下快門自拍的次數不下於一萬次，非常誇張，難怪日前影后劉嘉玲在新片記者會上亦封發哥為「自拍（selfie）神」！
近年發哥強勢回歸華語片市場，去年主演王晶執導的賀歲片《賭城風雲》在內地勁收逾五億元人民幣，在港亦大收三千五百萬港元，發哥熱潮再起，他主演的賀歲片《賭城風雲II》即將上映，近期網上出現多個「捕獲野生發哥」群組，誓要「活捉」、「生擒」發哥，用字「抵死」！網友以分享與發哥歷來的合照為榮，並寫上經歷回味一番，最近女歌手the pancakes更為偶像創作歌曲《給發哥的歌》表明勁想跟發哥自拍，足證發哥魅力沒法擋！
selfie神爆出沒熱點
日前《東網》記者遠赴北京成功「捕獲」發哥，發哥沒有「掙扎」，反而親切地帶同記者遠遊北京六環郊區，體驗在冰湖雪地上攝影的樂趣，受訪時他談笑風生，對最近的「捕獲發哥熱」笑不攏嘴並拋出金句回應，又分享與fans自拍的經歷及自爆出沒熱點。
「有聽過（捕獲呢個字眼），咪當我唔係人囉！哈哈哈！捕獲得一定係動物嚟o架啦！呢隻咁嘅動物通山跑一定要捉佢，可能佢有禽流感呀！哈哈哈……大家鍾意我係我榮幸嚟，你繼續捕捉我啦，我繼續走啦！如果我係一個觀眾，見到偶像都會影番張相啦！你諗吓如果佢睇咗周潤發咁耐，都冇咩機會見到佢真人嘅，依家手機咁方便影張相，仲要係發哥揸機喎！真係好難得嘅，咁我都好難得，有個影迷捧咗我咁耐場。我突然撞到佢，同佢影番張相只係舉手之勞，我隻手又長，好快之嘛！按一下，一秒都唔使，但換來卅幾年嘅支持喎！梗係要做啦！咁捧場喎，何樂而不為呢？當fans朋友咁，朋友叫你影張相唔通唔影咩？」
冷巾眼鏡 絕招迴避
「你問我呢兩年有冇影過超過一萬張自拍？應該冇啩，一千幾百應該有嘅，有時我行山呀、喺街度呀！唔係咁多人嘅。（成日畀fans要求合照有冇造成生活不便？）如果我有需要時就會咁囉！（語畢他將冷頸箍拉起遮面，只露出一雙眼）有時戴埋眼鏡，冇咩人認到我o架！如果我嗰日冇咩嘢，又唔趕時間嘅，咪拉開冷頸箍囉！（通常你會喺邊度出沒呢？）港九新界，麥理浩徑、衞奕信徑、鳳凰徑、西貢，邊度都有o架喎！」
「（有冇自拍經歷好難忘？）好多時位機主都唔知個自拍掣喺邊度o架，都要我教番佢！咁佢冇咩機會自拍嘛！除非有啲貪靚嘅就會對住部機化妝呀，睇番自己個樣呀，咁先會識o架啫，其他好多人都唔識，因為個鏡頭倒轉咗吖嘛！（fans仲有冇咩其他要求？）自拍完之後想我簽個名囉！我話自拍完就冇得簽名，簽名之後就冇得自拍喎！是但揀一樣咋喎！（有冇啲場景好刺激，好似馬路中心拉住你？）都有嘅，通常都畀我喝住佢，過完紅綠燈去個冇咩人嘅角落先影。」
人高手長 得人鍾意
「（有時發哥影完相會同fans傾偈？）如果唔趕時間都會，趕時間就拜拜走人o架喇！（有冇留意the pancakes寫咗首歌話想同發哥自拍？）聽咗啦！開心到死啦！又好cute啦佢！我哋應承咗佢話嚟個合影！（叫埋發嫂一齊？）睇吓佢想唔想同發嫂影囉！佢歌詞提到發嫂嘅，咁就最好啦！佢喺中間，發嫂側邊，我喺呢邊揸機啦！作為一個公眾人物，有人寫首歌畀你都感動嘅，好開心。（點睇自拍王呢個稱號？）因為我手長手定、人又高，兩個、四個、八個、廿個、卅個都影得晒嘛，咁先犀利！我唔係話叻咩嘢，係隻手長得人鍾意嘛！」