高海寧唱情歌 電暈巨聲仔

藝人高海寧（高Ling）前晚首登無綫錄影廠台板唱歌，為《超級巨聲4畢業演唱會》擔任表演嘉賓，與參賽者何嘉新甜蜜合唱《今天你要嫁給我》，兩人在台上除手拖手及頭貼頭外，又不時四目交投深情對唱，眼神過電令何嘉新暈晒大浪！不過高Ling受訪時否認偷嗒嫩男，並說：「佢得廿歲咋喎！我細佬咁大！」

李逸朗大晒哭腔

其實高Ling自2008年選美出道後都不乏演出機會，不過講到在無綫主場唱歌，她笑言從未試過，更緊張得手心冒汗：「台下面有好多專業評判，所以緊張到不得了。頭先（台上）嗰啲動作都係用嚟分散吓注意力。」

前晚的《超》騷另一高潮可謂是請了最近用哭腔翻唱《傻女》而成為熱話的李逸朗（阿Don）做表演嘉賓，同時亦是他首次現場唱《傻女》，連同場的林欣彤開騷前都謂非常期待。當晚阿Don雖有大騷哭腔，惟情緒明顯未及CD版本，他受訪時解釋：「我覺得喺觀眾面前唱原版係賣弄情緒，而我又唔係一個咁易喺大眾面前歇斯底里嘅人，所以改唱深情激動啲嘅，所以冇嗌囉。」

李逸朗使出哭腔唱《傻女》，未及CD版本般歇斯底里。	林欣彤以巨聲師姐身份獻唱。	顧紀筠現身撐囝囝陳浚霆，令囝囝喜極而泣。

顧紀筠為囝打氣

阿Don又醒覺原來自己已有12年未以個人身份踩無綫台板，同時對此深表感慨，反問自己12年來為何不知所終：「同期出道嘅，走得就走，上位嘅又名成利就。行上台嗰段路諗番起，覺得好惋惜。」另外，顧紀筠也有到現場支持參賽者之一的囝囝陳浚霆。

文：影視組