葉振棠樂貫滿盈
剛踏入七十歲的葉振棠（棠哥）大半生奉獻歌唱事業，他直言感謝上天讓他主唱過《忘盡心中情》、《戲班小子》及《難為正邪定分界》等一首首經典金曲。同時，棠哥多年來亦受到眼疾纏擾，熱愛舞台的他明言即使只餘半成視力仍不會放棄：「到我呢個年紀，唱歌係為自己開心，只要我仲唱到都會繼續唱。」
未打算退休
仍有心有力的棠哥可曾有一刻想過退休？他淡然說：「的確想過，都唱咗咁多年不如唔好唱啦，但無論公司同歌迷都同我講『你仲唱得，唔好退休住啦！』我回心一諗都係，唱歌其實係開心事，既然仲有能力唱畀人聽就繼續，所以打消念頭。坦白講到我呢個年紀唱歌係為自己開心，亦唔係要爭啲咩，唱咗幾十年咩都試過，都冇咩遺憾，只要我仲唱到都會繼續唱。」
恨紅館個唱
回顧多年的演藝生涯，棠哥笑說其實還有目標尚未達成，他興奮說：「咁多年歌唱生涯之中，有兩個心願好想完成，第一係出一張七十年代我唱過同我喜歡嘅全英文唱片，早排聖誕節期間已經實現咗，反應唔錯。另一個希望係不久將來可以喺紅館開個唱，希望好快可以實現。」問棠哥會否期待自己的五十周年紀念演出在紅館完成？他大笑說：「望就咁望，希望可以繼續唱落去。」
經歷三起跌
七十年代是香港音樂界急速發展的年代，在電影和電視劇主題曲薰陶下，一首首經典廣東流行曲傳頌至今，亦創造出一位位不朽巨星，其中一位就是當年以樂隊主音身份加入樂壇的葉振棠：「初入行唱歌頭五年我都係同其他樂隊『打單泡』，邊度有工開就去邊，分分鐘連隊名都冇，志在開工搵食。」
電視劇帶挈
到八十年代初棠哥作獨立發展，簽約無綫迎來首個事業高峰：「多謝上天畀機會我開始唱電視劇主題曲，呢啲係諗都無諗過嘅際遇。」多得上天安排讓我們唱片櫃內有《忘盡心中情》、《戲班小子》及《難為正邪定分界》這些家傳戶曉的經典名曲。棠哥續說：「通常音樂圈五至七年為一個循環，計吓我都見過五、六個，由當年打band開始，然後到獨立歌手唱無綫劇主題曲，跟住再幫亞視嘅《三國演義》、《我來自潮州》等唱主題曲，然後到近年再開始唱發燒碟，我覺得自己人生經歷過三個高低起伏。」
工作密麻麻
棠哥寥寥數句道出這些年來的經歷，但他依然有滿腹大計，包括三月在文化中心舉行兩場四十五周年紀念演唱會：「多得大家支持，門票差不多賣晒，佢哋好多由我七十年代唱英文歌開始，就聽我唱到依家，冇佢哋今次都搞唔成。目前仲同步做緊演唱會同名唱片，叫《笑傲人生》，嚟緊仲計劃去外地巡演，工作已經排到七、八月，目的想大家開開心心分享我嘅音樂旅程。」
眼疾當小事
聽到這些工作量，大家可能不能想像是屬於一名七十歲的前輩，棠哥中氣十足笑說：「有數得計，我廿幾歲入行，唱咗四十五年，雖然已經剛剛踏入七十，其實我自己冇咩太大感覺，精神都唔錯。開講有話『權不離手，曲不離口。』可能成日唱住又冇咩病痛，聽我把聲都知冇問題啦。」
多年來棠哥都受眼疾困擾，隨年紀增長視力問題日益嚴重：「因為細個猩紅熱發高燒影響到眼部細胞，導致有時睇嘢冇焦點。」早年更曾接受針灸治療，保住餘下的視力：「高志森介紹咗個中醫畀我，療程已經完成咗，要復原就冇可能o架啦，做療程只係令佢唔好繼續惡化。」
棠哥近年不論表演或出席公開場合都要架起太陽眼鏡，更要隨身帶放大鏡以備不時之需，但棠哥直言已不將眼疾問題放在心上，訪問當日見他行動自如，他謂：「始終個問題已經幾十年，習慣咗，係有時舞台上燈光太刺眼，影響到我咩都睇唔清楚，惟有表演時小心啲。反而唱歌絕對冇問題，唔熟嘅歌唔會唱，咁就唔使睇歌詞。」
後記：瞓足就夠氣
棠哥精神飽滿，容光煥發，小記都想自己七十歲時有棠哥的狀態，原來棠哥的保健方法也不難：「年紀大咗一定要注意飲食同適量運動，依家我食嘢好清淡。我都唔可以做太劇烈運動，最多都係緩步跑。其次係睡眠，一定要夠瞓，不過我唔早瞓，因為我鍾意夜晚諗吓嘢，總之有充足睡眠就夠，唔使進補或戒口，夠精神就夠氣。」
文：曹家誠
攝：司徒國榮
髮型：Chris Cheng@ILCOLPO Platinum
化妝：Sharon Hui
服裝：Kristy Lo@Mijosu
場地：一寶中日高級海鮮火鍋