詹瑞文粗俗歌遭禁播
舞台劇演員詹瑞文（詹Sir）剛加盟英皇娛樂，首張唱片蓄勢待發，頭炮新歌《舞大舞細》在網上熱爆，點擊率極高，但新歌本月初派上電台後，卻遭電台禁播，據知因歌詞太踩界，如「岳高啲」、「忟樣」等疑似粗口諧音，又有「bra帶」、「摑三奶」、又「鋤二奶」等意識大膽的字句。
推乾淨版補鑊
電台高層周國豐承認：「詹Sir新歌第一版係比較粗俗，隻歌本身冇問題，個quality都好好，但電台有廣播條例，如果播出街會畀人投訴，因為歌曲內容唔能夠太粗俗，有粗口同意識不良都唔得，甚至有啲玩諧音一樣唔得，我哋都有同佢唱片公司講首歌有啲粗俗，佢哋話會整個乾淨版畀我哋。其實以前都有啲歌係咁，詹Sir都唔係第一個。」新城高層朱明銳則稱：「其實佢首歌主要係放上網，因為網上冇條例監管，但電台就要考慮吓。」
就詹Sir新歌遭電台禁播一事，英皇發言人表示：「詹Sir玩一啲通俗文化，玩味重啲，佢想保留廣東話嘅諧音，因為易引起共鳴，可能會有啲敏感，亦令大家有所聯想。」徇眾要求下，英皇會為詹sir的新歌推出「乾淨版」。
文：音樂組