孫佳君燭動芳心：日日似情人節

孫佳君躺着與蠟燭宣言合照，表情相當受落。

藝人孫佳君雖年屆40，但依然美艷動人，相信愛情滋潤是原因之一。孫佳君與法籍大廚男友Olivier拍拖5個月，甜蜜滿瀉，日前她在微信朋友圈內大放閃光彈，上載二人的甜蜜點滴，照片中只見Olivier竟秘密在佳君房中用蠟燭布陣，利用多個蠟燭座砌成「I LOVE YOU（我愛你）SUN（孫）」送予佳君，令她不禁躺着都要與蠟燭宣言合照，更獲贈男友情深一吻，她受訪時冧爆謂：「我哋拍咗拖5個月，佢話送禮物畀我，我初頭都唔知佢送咩，點知一入到房就見到呢個蠟燭陣，我數過喇，用咗150個座砌成，真係好有心思。」

接收工齊齊浪漫

談到情侶間的驚喜，佳君稱一般戀人只會請食飯或贈以名貴禮物，其實是曲線讚男友Olivier浪漫有心思！她又謂：「今次呢個蠟燭陣仲OK，最起碼佢肯花心思去諗同埋砌。（情人節如何過？）佢間米芝蓮餐廳嗰日應該會好忙，所以要等佢收工先可以一齊過，但點慶祝就冇傾。其實佢好擅長炮製驚喜，令到我日日都覺得好似情人節咁，所以我都唔想知住，咁可以留返啲情趣！」

放大圖片	Olivier送甜蜜一吻，孫佳君登時冧爆。

文：影視組