薛凱琪十年蛻變

「那時候你所相信的事，沒有被動搖吧」

「咁多年我冇乜變過，係個人盡量圓滑咗，唔係假，我假唔到，我好想自己再圓滑啲，但個球依然有角。我堅持咩都要做到最好Try your best，一定要對得住自己、觀眾、公司，我冇一樣嘢求其做，無論係一個訪問，一個甫士，一個眼神，冇嘢係必然，好多人好想做呢行都做唔到。」

「以前自覺分清了黑白，但最近又疑惑」

「Wyman送呢份詞畀我，係想同我講，你經過咗十年喇，我話番畀你聽呢個世界係冇黑與白，有時好多灰色地帶，有時出十分力未必得到十分回報，如果想得到十分回報，就要出十五分力。我冇深究歌詞係佢心聲定我心聲，但好講到我其中一樣心聲，係呢十年無論遇到咩困境，我學識好多嘢，最大學識到嘅原來係我個人唔會咁易化，我會用一個冷笑話、一個take it easy、一個幽默啲嘅態度去面對殘酷或者啲比較複雜嘅嘢，用最純真嘅心去面對呢樣嘢，就係我呢十年點樣過。」

薛凱琪回望過去，每件事均堅持盡全力。

黃偉文先後為薛凱琪寫兩首歌，去年在紅館合唱。

「這十年來做過的事，能令你無悔驕傲嗎」

「我唔會為自己打分，我係咪唱歌、演戲最叻、最靚，呢啲我完全覺得係山外有山，但呢句歌詞『這十年來做過的事，能令你無悔驕傲嗎』，我可以好大聲、好驕傲地講係。因為無論對我屋企人、工作、錫我嘅人，我點用努力去回報番畀佢哋，我絕對擺晒我份心機落去，所以一定係無悔驕傲。我唔敢講有最令我驕傲嘅事，入咗行十年，我不斷同自己講，其實你樣樣嘢都唔夠好，會不斷同自己講你好差，但一上到台我會講I am the best！」

薛凱琪為演戲豁出去，不介意扮醜示人。	薛凱琪身邊不乏異性好友，但仍等待真命天子出現。	薛凱琪嫌自己未夠圓滑，但堅拒造假。
薛凱琪在演唱會上跳舞，極盡性感誘惑。	薛凱琪抱樂觀心態接受挑戰。

「連續在情路碰釘也未化」

「要Single咁耐唔係簡單嘅事，比我喺紅館連續跳一個鐘舞更加困難，但我都守候到呢樣嘢，係因為我相信有Mr.Right，就算市場好難先搵到啲比較好嘅人，唔係話呢個世界冇好男人，但一定要大家都啱、都夾。（因為你太忙，減低遇見對的人的機率？）有呢個可能性，但唔代表我唔做嘢一個月，晚晚去蘭桂坊就會撞到Mr.Right，可能只需要一秒機會，就會遇到佢。我唔心急，但我期待。」

後記 你快樂嗎?

歌詞最後一句問到「你快樂嗎」，對於現時貴為公司一姐的Fiona來說，難答嗎？

「我有我唔快樂嘅時候，會有好大煩惱，好唔快樂嘅時候，但都有好快樂嘅時候。其實快唔快樂全部係自己決定，我立志希望無論咩情景，我都係用樂觀快樂嘅心境去面對，所以近年我好多歌同電影都係好正面。」