祖兒「少女」願望 水底出嫁
樂壇天后容祖兒與男友劉浩龍（師兄）拍拖三年，雖然未有結婚打算，但原來祖兒對小朋友亦有情意結，見到BB更母愛氾濫狂搣面珠！揚言將來恨生兩個的祖兒更自爆見到周杰倫早前在歐洲大搞古堡婚禮激發出「少女心」想搞個水底婚禮！
容祖兒昨日出席馬拉松慈善活動，連續四年出席活動的祖兒在台上以過來人身份講到在家人生病時都好希望陪伴左右，呼籲大家要關心患病的家人，在做熱身運動期間，祖兒又突然母愛爆棚，不斷摸DJ朱薰囝囝面珠，場面相當溫馨！
談到祖兒的媽媽曾經患癌，現在她會否對有關癌症的活動特別踴躍？祖兒直言有親身經歷過後，明白病人面對病症時會很無助，所以現在亦會多做善事幫人。她又講到：「但好感恩，媽咪最近多咗好多朋友，有啲有同樣經歷嘅人會一同分享心得，媽媽由以前一兩個朋友，到依家會約兩個唔識嘅人出嚟，都可以話係因禍得福。」
被周董刺激
講到祖兒密密摸朱薰囝囝面珠，祖兒就大讚對方BB精靈，所以忍不住要與BB「淘氣」一番，她又笑言對小朋友會有幻想，最希望生兩個。談及早前她擔任楊千嬅演唱會嘉賓，被千嬅大爆與劉浩龍（師兄）「好事近」，祖兒即說只是演唱會上口快快：「千嬅係個講嘢好叻嘅人，唔使點思考就講到好多嘢出嚟，其實未咁快，因為近幾個月，佢（師兄）有新方向，我哋都會做咗嘢先。」雖然祖兒否認好事近，但就自爆「少女幻想」被周杰倫婚禮刺激到，現在覺得水底婚禮最靚、最巴閉！
師兄要減磅
另外，師兄昨日出席活動宣傳新戲《12金鴨》，大呻為新戲減磅卻未有露肉戲份，希望在年宵幫吳君如睇檔時「脫一脫」！講到因為師兄發功拉攏，祖兒才肯做千嬅演唱會嘉賓？師兄笑說：「唔係，我叫劉浩龍，唔係拉攏啊！」談到祖兒透露想要個好歸宿，師兄就話：「要先做好工作（唔會龜縮啩？）唔係龜，係鴨。」
文：音樂組