吳君如掟30萬 年宵賣Under
今年賀歲電影套套「戲」勢如虹，女星吳君如為求突圍奇招出盡！昨日她與古天樂（古仔）到銅鑼灣宣傳賀歲新片，將花費30萬元在維園擺年宵攤檔，售賣孖煙囱及「T-back」，不過並非性感衣物，而是玩食字賣「Tea bag」（茶包），貫徹君如的搞笑作風！屆時她更會率演員落區睇檔，與市民作近距離接觸。
每年賀歲檔都是兵家必爭之地，今年有多套大型港產片上映，包括吳君如、古天樂及謝霆鋒等群星主演的《12金鴨》，周潤發、張家輝及劉嘉玲的《賭城風雲Ⅱ》，吳鎮宇、古天樂及張智霖的《衝上雲霄》，古天樂、曾志偉及毛舜筠的《浮華宴》，幾部戲各有賣點，電影公司為突圍而出，無不絞盡腦汁鬥Gimmick！
收入捐慈善機構
君如去年炮製的賀歲片《金雞SSS》大收旺場，今年轉「玩鴨」反串做肌男，噱頭十足，向來諗頭多多的她更打算在維園擺年宵檔谷戲！昨日君如率領古仔、劉浩龍、蔡瀚億及姜皓文在銅鑼灣出席電影宣傳活動，為現場2.5米高的金鴨Figure進行揭幕。君如豪花30萬元在年宵開「鴨店」，更會隨時帶片中演員殺入維園，勢必令逼爆的花市更墟冚，她說：「2月13日開張，我會親自去睇檔，得閒會帶埋個女落去，我一知道有呢個戲就想投個年宵檔，幾十萬投番嚟，計埋裝修使咗好多錢，攤位就算唔係全場最靚，都會好金，我哋會將賣貨嘅錢捐去慈善機構，戲入面有份演出嘅朋友都會落嚟玩吓，不過古生（古天樂）話唔得閒，嚟唔到。」
賣福袋內有乾坤
活動上安排兩位上身赤裸、只穿孖煙囱的男模上台介紹年宵攤檔售賣的福袋，君如見到兩名裸男即眼甘甘，表現High爆，她透露福袋內有男女通殺的法寶！君如笑說：「我哋有孖煙囱賣啦，仲有T-back添喎！不過唔係着上身嗰啲，係飲嗰啲Tea bag（茶包）！」在旁的古仔搭嘴說：「如果你鍾意嘅都可以着上身o架！」君如還擊說：「其實茶包最啱佢（古仔），都係要Chok吓Chok吓！司儀話飲咗壯陽，我都要預啲畀我阿爸冬叔（夏春秋），佢80幾歲，需要呀！」認真抵死！
她再透露福袋內有笑口棗、鳳梨酥及寫上生鬼句語的利是封，她讀到「一Q獨得」時即搞Gag說：「呢啲你哋男士最鍾意啦！」君如為《金》片可算法寶盡出，單是演員名單已甚有睇頭，碌盡人情卡請來謝霆鋒、趙薇、容祖兒、陳奕迅、任達華、黃秋生、王菀之、周秀娜及前EXO成員鹿晗等放笑彈，星光熠熠！
文：影視組