蔡思貝NG獲前輩耐心教
藝人唐詩詠和蔡思貝早前現身大埔花圃拍新劇，身為新人的思貝不時NG，前輩詩詠耐心對戲，更謂兩人性格直腸直肚，相信很快會熟絡。被封為「發電廠」的思貝劇中與黃德斌發展師徒情，但她無懼會跟拍檔傳緋聞！
唐詩詠和蔡思貝早前為無綫新劇《當鐵馬遇上戰車》到大埔取景，兩人飾演交通意外調查組的鐵騎女警，詩詠與袁偉豪更由冤家發展為情侶。當日劇情講述詩詠與思貝一齊寫報告，惜被「阿Sir」袁偉豪玩針對，嬲爆的詩詠在花園種花，好友思貝則前來安慰。
角色貼近性格
拍攝當日，雖然後輩思貝不時失誤NG，但詩詠也耐心地跟她對戲，相當專業。詩詠指由試造型時初見面，已感覺與思貝可很快熟絡，她說：「可能大家都直腸直肚，唔需要浪費太多時間去了解。（你係前輩喎？）唔係，我只係經驗豐富過佢少少。（請教你？）第一日開鏡大家仲摸索緊，未去到真係傾偈，呢套劇每個角色都好貼近本身性格，相信佢唔需要請教任何人。」提到思貝出道至今緋聞不絕，更被封為「發電廠」姣溝一眾小生，詩詠表示甚少留意花邊新聞：「我從來唔會用報道去了解一個人，我都係需要相處。」
傳緋聞當宣傳
自言遭緋聞纏身而不開心的思貝，透露劇中與黃德斌發展師徒情，問到會否擔心再傳緋聞？她說：「唔係啩，應該唔會嘅，依家用平常心對待，因為已經傳得太多啦，做得呢行都知係咁，傳緋聞咪當宣傳囉。（會避忌？）我都係做番自己，對人友善。」
拍攝時，穿短褲騷腿的思貝又惹蚊針，她卻自稱適應能力強冇有怕，又謂早前劇集《衝線》到台灣拍外景，怎料因曬足三個禮拜而黑晒，她大呻：「真係日日曬到人都乾，手腳、膊頭、鼻頭都甩皮，希望今次唔使曬咁多，皮膚白番啲好啲，咪睇唔到我上鏡。」
文：影視組