少爺占新春玩仔 老土Look拜年
新手爹哋少爺占（甄子康）今年初次一家三口度新春，並計劃將囝囝打扮成「老土萌B」逗利是。至於中文程度半桶水的連詩雅（Shiga）誤將煎堆當生根，羊年目標要苦練中文，誓要唱得又Talk得！
少爺占日前在荃灣為個人潮牌Pop-Up Store舉行開幕禮，請來拍檔當奴擔任司儀及揭幕嘉賓連詩雅。分店遍布全港的老闆少爺占直言利潤不多，並勉勵本土創業同行繼續加油：「其實冇乜點賺，香港做生意好困難，無論做食肆、做音樂，大家都覺得外來嘢馨香啲，但我覺得既然都開咗個頭，一定要堅持落去。（蝕錢？）我當係將錢放咗喺銀行投資，希望有朝一日可以同大家講『我賺錢啦』！」
着棉襖見Do姐
剛榮升爸爸的少爺占透露農曆新年將會與囝囝留港度過，更要把寶貝仔打扮成「老土BB」拜年：「話晒係佢第一年過新年，打算趁佢仲未知醜，買啲老土棉襖畀佢着去賀年。以往見到啲前輩Do姐（鄭裕玲）、阿倫（譚詠麟）都會派利是畀我，今年囝囝逗埋利是，我可能賺凸添。」
Shiga煎堆當生根
至於Shiga在台上與粉絲玩遊戲時，因不諳中文而將煎堆當成打邊爐吃的生根，事後她笑言：「我真係好慚愧，中國啲傳統嘢食我唔叻，好瘀呀！嚟緊會努力苦練中文，做吓功課。」她預告新年將與家人度過，問到可會帶男友見家長？她說：「冇研究呀，到時先算啦，但我覺得一個人會逗得多啲利是。」問到與男友首個情人節計劃怎樣度過？她說：「仲諗緊，做完手頭工作先，最近拍緊一套電影，我要扮到口音唔正。」
文：音樂組