林志美即場錄歌留住靚聲
唱得之人林志美將於下月七日舉行《Timeless Samantha's Live林志美音樂會2015》，屆時更會現場錄製Hi-fi DVD，為觀眾帶來聽覺的享受，她直言一直嚮往舉辦這類型的音樂會，終能圓夢的她為求完美，更放棄參與內地歌唱比賽，並有意邀請新進歌手合作，務求擦出無限火花！
林志美（Samantha）即將舉行的音樂會以「靚聲」做主打，原來這是她一直想做的事：「呢種形式嘅音樂會場地唔可以太大，可以同觀眾近距離接觸，佢哋可以感受到音樂、樂手彈奏等，係同紅館唔同。」她坦言一直有機構邀請她到紅館開騷，但近期Hi-fi流行的關係，亦對此感興趣。
問到會否因Hi-fi音樂會強調音質而擔心？她笑言：「興奮多啲，會有緊張嘅，但係因為時間問題，揀歌好花時間，好耐冇聽過所有歌，揀同聽嘅過程好感動。」
要新火花
她又表示重聽所有歌曲，發現在唱法上有很大的改變，但保證每首歌都會保留當時的唱腔。至於嘉賓方面，問到會否找「最佳拍檔」蔡楓華合作？Samantha指對方也忙於準備音樂會，亦坦言這次想要新鮮感，盼邀請C AllStar及馮允謙擔任嘉賓：「佢哋形象正面，C AllStar四個人可以有好多變化，擦出新火花。」
唔會亂嗌
Samantha為今次音樂會付上不少心機，甚至為此退出內地歌唱比賽節目：「開頭冇諗住參加，但呢個比賽係唱粵語歌，我係粵語歌輝煌時期嘅一分子，所以就支持吓，今次退賽原因音樂會係一部分，但我覺得有個被淘汰嘅內地新進男歌手比我更需要呢個機會，所以我讓畀佢。（可惜？）唔會，我想專心做好一件事。」現在距離音樂會只剩短短日子，問到除了積極排練外會如何保養靚聲？她笑言：「要多謝上天畀呢把聲我，我冇特別keep，唔會亂嗌囉，同埋演出前食嘢要小心啲，例如唔好食辣，不過我唔太鍾意所以都冇問題！」
文：音樂組
攝：林定兒
場地：Queen's Cafe