周秀娜Bra閉獲注資半億
性感女神周秀娜去年底打造內衣王國，以32D導彈親身示範靚Bra，娜姐的「遠程導彈」近日更射到美國，獲美國金主睇中注資五千萬港元，認真「Bra」閉！銳意三年內上市的娜姐，自爆新年會到日本滑雪，尋覓「翻版金城武」。
去年底成立自家內衣品牌LAANAA的性感女神周秀娜，以自己的32D完美身材親身示範內衣，剛起步經已氣勢如虹，除有內地投資者合夥外，據知近日更獲美國金主睇中有意注資，認真「Bra」閉。因娜姐主理的品牌主力做網購生意，其客戶遍布整個亞洲，故美國金主對娜姐信心十足，睇準內地以至整個亞洲市場，計劃注資五千萬港元，現時雙方正洽談細節，料今年底至明年初成事。昨日娜姐在港舉行《LAANAA誘變創業發佈會暨內衣騷》，美國金主方面亦有派代表出席，誠意十足。
獎勵自己 買舖收租
昨日本報致電娜姐求證，她直認：「好緊張自己事業，有長遠計劃，近期係有投資者傾緊嘅，希望業務迅速發展，可以衝出亞洲。」演藝事業及生意均發展迅速，問如何獎勵自己？她說：「買舖收租囉！希望兩年內可以實現。」她又自爆農曆新年會到日本：「上年新年去咗日本滑雪，咁今年都會去。我本身就鍾意金城武嘅，希望去到會有個好似金城武咁靚仔嘅教練陪我滑雪啦！」
昨日品牌發布會前，身為老闆娘的娜姐一早到場打點，人緣甚廣的她獲容祖兒、曾志偉及鄭伊健等拍片祝賀，伊健更搞笑地祝她「Bra如輪轉」。台上有三位性感女模示範內衣，娜姐則在台下細心觀賞。
性感騷胸 要睇場合
升呢老闆娘的娜姐昨日封胸上陣，以黑色露肩上衣配長裙。問為何不親自行騷？她說：「你畀我過吓老闆娘癮啦！工作時都有自己着，三位Model好過我。今日開始賣，希望好似伊健講咁『Bra如輪轉』。啲Bra嘅價錢計番平方係好似樓價咁高o架。（封胸？）唔係，我係第一身試着。（事業線？）睇場合啦，我都有示範內衣。」
娜姐即席宣布與阿里巴巴旗下購物網站天貓合作，並稱投資了八位數：「咁唔係淨係我嘅，仲有其他投資者，我對呢盤生意好有信心。」自言熟悉內衣的她更計劃年底在香港開舖，銳意三年後上創業板。
文：專案組