朱咪咪唔嗌咪拒上《我是歌手》
將於紅館開騷的朱咪咪，早前獲內地音樂選秀節目《我是歌手》邀請，她坦言興趣不大，並非怕輸唔起，只是內地歌手參賽嗌到聲嘶力竭，並非她的唱歌風格！
藝人朱咪咪快將在二月六、七日假紅館舉行兩場《朱咪咪我做晒演唱會》，昨日咪咪姐就現身錄音室為個唱做綵排，並邀得粵劇名伶陳詠儀任嘉賓，一同大唱粵曲。雖然演出臨近，但就沒有節食健身的需要，她說﹕「最緊要養聲，講少啲嘢嗌少啲交就得o架啦！」
否認暗寸G.E.M.
咪咪姐表示除粵曲外，亦會獻唱多首流行曲﹕「我本來想唱《你把我灌醉》，但其實首歌頭段好悶，得中間位係勁，所以後來換咗第二首。」問到咪咪姐此舉是否暗寸憑這歌揚威內地的G.E.M.（鄧紫棋）？她說：「嘩，唔係，我上次演唱會都有唱其他歌啦！」
同時咪咪姐又透露早前曾獲內地音樂選秀節目《我是歌手》邀請，她說：「佢哋有聯絡我問我有冇興趣，我話等完咗演唱會先傾，坦白講內地歌手個個嗌到聲嘶力竭，咁樣唔係好啱我。」而且更直言自己實在不用參與這類節目：「我唔係輸唔起，只係唔鍾意畀佢哋叮，喺十四億人面前畀人叮走，以後仲使出嚟撈？我都有自己尊嚴，可以喺紅館開騷，飛都賣晒，我係唔紅唔係好有地位，但好有自尊。」
文：音樂組