「大咪」親民冧盡o靚妹 遺作再踎監：特別有感情
電影《監獄風雲》中飾演「大咪」的何家駒，事隔多年後，早前再接拍監獄片《壹獄壹世界》，又再次演繹其經典對白「忍一時風平浪靜，退一步海闊天空」，未料最終成為其遺作。對於駒哥的離世消息，電影公司老闆蕭定一亦很愕然：「好可惜，冇諗到咁快離開，好突然。」並謂得悉對方身體欠佳，但因喜歡拍戲而答允參演：「佢表現好專業咁完成套戲，為人好nice、好合作。（成為遺作？）佢都話咁多年冇拍，都好想拍監獄片，今次做番『大咪』都特別有感情，仲話好好玩、好開心。」
同片演員嘆可惜
片中，駒哥慘被張建聲拳打腳踢至流血，張建聲昨日慨嘆香港少了一個經典：「可以成為駒哥人生最後一個對手，好光榮，喺佢身上學到淡定，建立自己嘅style。最深刻同駒哥拍攝動作戲，佢仲不時提點我。」同片的王宗堯指駒哥是個敬業、樂觀的前輩，演技亦爐火純青：「知道佢冇乜家人喺身邊，如果有乜身後事需要協助，我都會幫手。」一眾女演員林芊妤（Coffee）、郭奕芯（Ashina）雖然冇對手戲，但見過面都大讚對方好nice。
