城城感觸認Dry求天賜另一半

天王郭富城（城城）與前英格蘭球星米高奧雲（Michael Owen）昨日出席馬場紀念盃活動，二人甫出場即雞啄唔斷，可見友情非淺！城城表示近日因在無錫拍戲而生病，故整個人消瘦不少，又透露今晚將任歌手楊千嬅演唱會嘉賓後，明天便飛返當地回歸劇組。

談及舊愛Lynn正沐浴愛河，問到城城會否祝福對方，他大方回應：「當然會祝福，我自己呢兩年感情空白，時間都擺晒工作上。我覺得緣分係天注定，唔會刻意強求。」問到Lynn曾暗示自己讓人缺乏安全感？他衷心說：「過去嘅事唔再評論，因為我係男人。好多嘢放喺心上，我會去承受，唔會用口去批評，呢個唔係我風格同態度。男人應該要有風度，見佢咁幸福，我都好戥佢開心。不過，都希望將來上天安排一個好錫、好體諒同明白我嘅另一半畀我，自己都會諗吓一個幸福家庭係點樣，但冥冥中就係咁，唔知係咪我要求高呢。（你要求係咩？）要有內涵，內在美同外在美。」

桃色新聞失實

而對於早前因桃色事件成新聞焦點，城城再三表示已在微博交代，不再回應：「再回應就變連續劇，同埋我已寬恕傷害我嘅人，唔會追究。（以後會否再喺社交網站add後輩？）唔再回應，因為好多內容都唔係事實。呢啲嘢侮辱得我好緊要，希望大家尊重番我。」

奧雲偷嘗美食

另特意訪港及逗留三天的Michael則表示非常高興再次與品牌合作，又笑謂希望跟城城一起健身及賽馬，還透露前晚已品嘗香港地道美食，今天將與香港足球隊交流球技。問到如果城城向他的馬房購買馬匹有何感覺？他高興表示：「好啊，我都期待。（幫佢訓練馬？）我有兩個練馬師，睇吓有冇呢個機會。（畀discount？）佢唔需要啦！」

文：名人組