千嬅瘦不可擋逼Eason發憤

楊千嬅事隔多年再度踏足紅館,已為人母的她在台上不時講到與囝囝Torres的生活趣事,自嘲在囝囝眼中是「妖精」!千嬅又請來過氣情人陳奕迅(Eason)撐場做嘉賓,Eason即場發揮「吹神」本色大談「減肥經」,笑爆全場!

楊千嬅前晚在紅館舉行「楊千嬅Let's Begin世界巡迴演唱會2015」頭場,共換了九套衫,當中不乏Deep V、露背的索爆晚裝,除了首次挑戰彈豎琴,千嬅又穿上吊帶背心加黑絲勁跳18分鐘。

為囝囝Keep Fit

跳完歌曲《色惑》後,千嬅笑說:「頭嗰十幾行呆晒,放心唔係撞鬼!不過我個仔(Torres)見到我,應該會以為我係電視入面啲妖精,平時佢見我化妝就會黑面,因為知我就出門口。」她又講到今次個唱操Fit自己,其實是為了囝囝:「我健身教練話我唔為自己做都為個仔做,要有Fit嘅體格先可以同囝囝走更遠嘅路。」

換上紫色露背裝的千嬅唱畢《冰點》和《笑中有淚》後,講到雖然很少在演唱會上唱這兩首歌,但每次唱都感觸良多,她又突然搞笑說:「媽咪為咗令Torres認得我,喺我唔喺香港時不斷播我演唱會、live嘅碟佢睇,有時我都會擔心佢嘅童年唔係咁樣就過呀嘛?但囝囝永遠喺我喊時就會跟住喊,其實我除咗有癲喪嘅一面,有一面係較傷感。」

吹神想試針灸瘦身

整晚最矚目的是千嬅的陳年舊戀人陳奕迅做嘉賓,更瞓身演出,Eason先獨唱一曲《狼來了》,之後與千嬅對望合唱《因為愛情》,「吹神」Eason不放過任何吹水時間,同千嬅大講減肥心得:「我哋九十年代中入行嗰時身形都係咁,但見你前排開始瘦,我就覺得……唔得!連佢(千嬅)都冧咗,我要堅持呢個精神!但我知佢瘦唔係唔食嘢,依家都心郁郁,聽聞有朋友識針灸唔使辛苦都瘦到,如果我瘦到,就着你嗰件金色舞衣!」

文:音樂組