Crystal趕住衝線臨尾拗柴
一年一度渣打馬拉松賽事已成為圈中藝人一大盛事，今年保守估計有半百藝人出戰，當中的10K（公里）賽事有連續九年出賽的劉心悠負傷上陣，前HotCha成員張紋嘉（Crystal）因衝線心切，搞到臨尾「拗柴」，賽後要急睇跌打，自封懶豬Crystal慘變「跛腳豬」，而歌手連詩雅（Shiga）和陳嘉桓（Rose）因睡眠不足，前者差點跑到嘔。
有份出戰10公里賽事的劉心悠、Crystal和黎美言（Winkie）於昨晨三時多已於灣仔集合等候出賽，Crystal和Winkie均承認未有做足賽前練習，Crystal坦言：「冇乜點練，因為忙住搬屋，平時都有跑，只係最近天氣凍，所以懶豬囉！希望好過上次成績，上次成績仲差過第一次。」而好友Winkie負背傷出賽，她謂：「間中都有的起心肝跑，跑完排咗毒個人都精神啲，但之前整親背脊，所以希望用意志力跑，就算跑唔到，點都行完全程。」
腳腫痛急睇跌打
賽事期間Crystal不慎右腳「拗柴」，賽後她即忍痛看跌打，致電「傷兵」Crystal，她表示：「跑嘅過程原本好順利，但臨尾跑到維園上斜路個大彎時，因為之前練習唔夠，我又心急，想用最快時間衝線，點知右腳就拗咗一拗，當時唔覺得痛，冇理到就繼續衝囉！點知跑完就愈行愈痛，腳眼仲腫晒咪去睇跌打囉！」Crystal讓跌打醫師「捽腳」及敷藥，據醫師稱她是普通扭傷，要休息三至四天。問到出年可會繼續參加？Crystal坦言：「梗係繼續跑啦，不過都會好好休息隻腳先，我都驚o架，靠對腳搵食，我要跳舞o架嘛！」而Crystal今年跑出1小時10分，成績更勝去年，受傷而變成「豬蹄」都算值得。
至於第九年參賽的劉心悠，因早前開工拗柴要帶傷出戰，她謂：「腳力係弱咗，唔會Chur得太行，會用自己最差嘅1小時15分作為目標，希望順利完成。」最終心悠負傷以1小時12分51秒跑畢，算成功達成最低目標。而心悠賽前亦稱有想過到其他國家參加馬拉松，並獲紀嘉文（香港馬拉松代表）邀請到日本參賽，但因對賽道不熟及擔心身體未能適應而婉拒。
連詩雅險跑到嘔
同樣跑10公里的Shiga則險些跑到嘔，她自爆緊張到失眠，凌晨兩點才睡，只睡了兩小時便起床：「唔夠瞓諗住食多啲嘢，咪食咗好豐富早餐囉，點知跑到想嘔，好辛苦。」而Shiga稱賽前有練跑，但近年有膝患，踎低起身會有「嘞嘞」聲，有人提議她要補鈣。同樣受失眠困擾的Rose首次參加10公里，她稱成績比預計的個半鐘快了五分鐘：「尋晚睇完演唱會，又囉囉攣驚起唔到身，唔夠休息，但總算完成咗件心事，冇諗過會跑10公里，依家跑完心情好興奮。（下次跑半馬？）要跑多幾次10公里先，同埋我又曬得未夠黑，練多啲，曬黑啲，有健康膚色去跑半馬。」
文：音樂組