苟唯的友情撐得住

梁：梁烈唯 苟：苟芸慧

梁：苟姑娘，我同你喺《飛虎Ⅱ》可以話係再續前緣，喺上一輯《飛虎》雖然係你力追我，但我哋條感情線都已經好浪漫，今次我哋更加sweet！一開始，我哋就係一對，仲會求婚添，雖然冇乜誠意！

苟：同唯唯合作係最relax嘅，因為你性格天真，個人純品，同你合作一定會有火花，不過最辛苦係忍笑！

梁：咁你記得keep住同我拍喇！苟姑娘，你係我女神，你拍住我，咁我都變咗做男神！你sweet得嚟可愛，個個想追你，但都追唔到，點解呀？因為個個都硬邦邦咁，點及我咁鐵漢柔情！

雖然唯唯口多多，但苟姑娘說冇被他激親。	唯唯喜歡整古做怪，苟姑娘一於奉陪。	《飛虎Ⅱ》中，唯唯練大隻。

苟：其實相隔兩年，再同你合作，都好多謝你！唔覺唔覺，原來時間過得咁快，呢段時間，我都經歷咗辛苦日子（被甲狀腺問題困擾），好需要身邊有朋友撐住，而你就經常將歡樂帶畀大家，除咗講笑，你又會唱歌仔。

在第一輯《飛虎》，唯唯騷肌。	苟姑娘最鍾意聽唯唯發言。	唯唯對着昏迷的苟姑娘做戲晒演技。

梁：「燃亮我意志，鼓起我勇氣……」我扮林子祥唱歌，都係想大家開心啫！點解咁多歌唔揀，偏偏唱呢首？唔知呢，總之我想娛樂大家就唱歌囉！我咁撐你，苟姑娘，你記得第時要斟茶畀我呀！唔會覺得我咁多嘢講，好煩吖嘛？

苟：唔會煩。

男人勿語 Man啲

梁：其實我以前都試過口多，激嬲過你，唔只你，仲有黃智雯、楊秀惠……可以話激得嬲嘅，我都激嬲晒咁滯！可能講者無心，聽者有意，又或者只有我一個覺得好笑，依家人大咗，望番轉頭，至識諗，與其講咗出嚟，有可能會激嬲人，其實唔講都唔會死啫，咁咪少講幾句囉！

苟：吓，你有激嬲過我咩？我唔記得嘅？不過當事人都唔記得，你就記到依家，證明你份人都好上心，就算真係激嬲人都係冇心嘅。

梁：你唔記得就好，費事我一講番，你又記番起，又再唔開心，咁就好無謂。況且Man嘅男人唔係點講嘢，我都要Man啲！

命運在手 改名有諗頭

苟：你可以講多啲o架，因為我唔鍾意自己講，鍾意聽你講！

梁：之前我將阿爸幫我起嘅「唯」改做「維」，係唔想自己再咁多口，唔好再咁多戲言，想認真番啲，咁對人、對自己都會好啲，改名係一種決心，男人三十歲先係個開始，改名後我感覺自己有改變，同之前有唔同，不過有人同我講話「維」字唔啱我，情緒又有啲唔好，所以又改番做「唯」，話唔定我40歲時大有作為，到時又會改名做「梁烈為」，或者到時我想好似開圍骰咁通殺，改名做「梁烈圍」都得o架，人生就係要不斷學習同戰鬥！

苟：好似你健身咁？

梁：其實我拍《飛虎》第一輯嗰時，我都有問監製做乜唔搵我露？但今輯我唔係特登操條人魚線出嚟，演飛虎喎，梗係要有番個飛虎身形！第一輯我都有，不過第二輯多咗啲肉地，咁先至好睇，着住衫我都覺自己好睇！有場戲講我同羅仲謙包住條毛巾出鏡，我同監製商量，圍到條毛巾咁低，電視尺度過唔過到？結果成場戲我哋唔可以亂郁，驚條毛巾跌落嚟！我哋今次嘅演出好搏命！

苟：有場戲你企喺我後面教我揸槍，你心口壓住我背脊，我都感受到你啲肌肉！不過我唔鍾意男仔太大隻，好似你咁都夠，再大隻啲會令人嚇驚！

梁：我唔只得個殼，我演出都好畀心機，我有場喊戲，攝影師拍緊時都睇到喊，我都好鍾意，因為我用咗三種方式去演繹，畀監製揀，嗰場戲我覺得同一般電視劇嗰種開水喉式喊戲嘅傷感唔同，我依家諗番起都有種揪心感覺！

苟：我都feel到嗰種心痛！但我個角色諗嘢直接，對愛情都有自己想法，勇於追求，第二輯又講我已經追到你，所以好開心，冇需要喊。

後記

苟芸慧與梁烈唯，一個惜言如金，一個滔滔不絕，性格雖然大相逕庭，但卻建立出真摯友情。當苟姑娘提到她的甲狀腺問題，她說：「未病嗰時唔會知病係咩感受，病咗之後收到好多人關心，發現好多人愛惜自己，我都唔識點向佢哋表達多謝，當然亦都有人攻擊自己，呢個經歷對演戲都有幫助，個病令我體會到心理質素對健康好重要，甲狀腺問題因人而異，唔係一、兩日就好番，需要多啲時間調和，調理好，才有動力去實現目標，至於體重其實唔使太在意。」唯唯在旁細心聆聽，不再gag王上身，如果不是朋友，又怎會這樣關心對方？這是讓人久違了的真正友情！

採訪：影視組

攝影：張福宏

梁烈唯

服裝：MUSIUM DIV. @ I.T

化妝：Circle Cheung（ndnco.co）

髮型：Kei Fung @ HH hair.nail