學友義不容辭 53歲唔驚老
「歌神」張學友因為感冒菌入眼，搞到眼角膜發炎，左眼紅腫，昨日戴上黑框眼鏡出席義賣曲奇活動，為長者服務籌募經費，同場還有女歌手黎美言、岑日珈、陳綺雯。連續17年為大會做宣傳大使的學友笑說：「我都好快可以受惠。」一臉灰白鬍子的他更幽默笑言切合大會形象，記者指學友還有段日子先可以攞長者卡，他即笑說：「準備得嚟差不多。」
冇諗過退休
現年53歲的學友可會驚老？他笑說：「唔驚，如果驚過多幾十年咪好慘，唔同時間有唔同嘅靚，（你依家呢？）依家咪靚囉！」他表示身體狀況好，個人自然有charm，所以每星期他都會做兩、三日運動，又會打網球！可有想過退休？學友坦白說：「冇諗過，每個人行嘅路都唔同，我都想睇吓自己究竟可以唱到幾多歲，（70歲嘅葉振棠都唱緊！）睇吓唱得耐唔耐過佢。」對於粵劇名伶龍劍笙（阿刨）70歲還在唱，學友一臉愕然：「阿刨70歲？睇唔出，咁好嘢，咁我都要唱吓粵曲，練歌應該有幫助，咁我要日日練！」問到他將來可會搞大壽？他搞笑說：「避得就避，唔好提，唔使搞。」
跟後輩交談
學友認為心態都好重要，要時刻保持進步的心，這樣人就年輕，跟後生一輩多傾談，他笑說：「睇吓佢哋同唔同我傾，一陣人哋覺得我唔啱傾，（畀人推過？）冇，我呢啲咁保護自己，見勢頭唔對就唔會走埋去哄，咁肉酸，但我唔介意同佢哋交流。」
文：音樂組