千嬅大勇開騷晒iPad胸
闊別紅館舞台4年多的楊千嬅為紀念入行20周年，昨晚重踏紅館舉行演唱會，獲老公丁子高帶埋囝囝來打氣！中「紫」毒的她將現場打造成紫海，曾表示心口掛住勇字的千嬅穿上激光紅袍獻唱《勇》，接住除去紅袍剩下閃閃長裙晒iPad胸。
楊千嬅榮升母親後的首個紅館演唱會「楊千嬅Let's Begin世界巡迴演唱會2015」昨晚開鑼，吸引林夕、林二汶、王祖藍及陳奕迅老竇陳裘大捧場，身為老公的丁子高帶同寶貝仔丁進諾、外父外母現身打氣，全家總動員撐場。
陳奕迅任嘉賓
極愛紫色的千嬅今次大玩激光，舞台掛上巨型銀色布，當千嬅準備出場時，大會以紫色大光燈射向銀色布，利用反射效果營造紫海，接住千嬅以激光大紅袍一口氣唱出金曲《勇》、《狼來了》及《煉金術》，期間除去紅袍剩下大露背裸金色閃長裙，由於千嬅瘦了成個碼，雖然是低Ｖ長裙，但欠缺睇頭，只有iPad胸贈觀眾，更瘦到青筋暴現。
大笑姑婆千嬅開心說：「你哋好嘛？好開心呀，今晚唔只你哋等咗好耐，我都係，多謝你哋。」另外，千嬅老友陳奕迅昨晚擔任嘉賓，更孖住千嬅出席拜神儀式及切燒豬，而千嬅歌迷則送上寫有個唱主題的花籃及巨型咪。
採訪：音樂組