梁思浩：歡迎借錢免欠單
梁思浩以嘉賓身份亮相亞視義演活動，期間叫魏秋樺搵王征「攞錢」，又建議袁潔儀及劉錫賢搵成龍「度水」，更公開呼籲亞視員工找他免息免欠單借錢，全程表現寸爆兼「豪氣」非常。對於被指到處「辣火頭」，思浩堅稱：「我有根有據！」
亞視前晚總動員演出《萬眾同心撑（撐）亞視》，獲無綫及有線派出藝員拍短片以表支持，nowTV方面索性讓梁思浩帶隊上演《娛樂審死官》。短短十數分鐘的演出，思浩完全「率性而為」，當拍檔李麗蕊呼籲要出糧給亞視員工：「唔好再用啲匪夷所思嘅方式去借錢。」他即接口道：「大家可以打畀我，唔使息同借據嘅。」
寸王征掛住唱K
他又「質問」與王征私交甚篤的魏秋樺，為何不代表員工「追數」﹕「依家水深火熱，（王征）唔好掛住唱卡拉OK。」搞到對方腼腆答：「思浩，你口下留情啦。王先生好忙，我都忙住派飯券呀。」思浩更多次叫袁潔儀及劉錫賢向演藝人協會求助：「打畀成龍啦，佢大把錢，要成龍電話問我攞。」對於「辣火頭」指控，思浩昨接受電話訪問時表示：「袁潔儀佢哋係藝人冇底薪，勞工處幫佢哋唔到。成龍係演藝人協會主席，梗係搵佢啦，係人都知佢有錢。我講嘅有根有據，所以唔擔心。」
拍賣收益出糧
亞視前晚的演出製作費約10萬，但廣告收益保守估計達4、5百萬，亞視發言人表示會分配作員工薪金之用。另外義演內「違規」舉行的拍賣籌得68萬7千元，「亞洲會」負責人魏秋樺表示：「知道係要事先申請（拍賣），所以過程冇播出街。其實類似嘅活動12月都舉辦過，款項會交畀亞視，用嚟出糧畀員工。」而無綫藝人拍攝的打氣短片，由始至終沒提「亞視」兩字，無綫發言人曾醒明回應謂：「藝人錄嘅時候，都知道條片係亞視播，再講（亞視）有啲畫蛇添足。」
文：影視組