江希文：冇結婚，佢冇撫養權

江希文：江 記者：記

記：胡漢清話你係戲子，日日帶女出騷？

江：我日日都係咁湊個女啦，我又冇工人，唔通空氣湊佢咩，話我做騷？你問番佢邊個做騷啦。

記：胡生話你贍養費由五位數加到六位數？

江：呢啲唔答啦。

記：胡生話希望你爸爸可以做個女嘅監護人？

江：唔麻煩啲老人家啦！

之後江希文與女兒往買玩具，離開時再受訪，期間還感觸哭起來。

記：對於將遭入稟禁霸大宅，有咩打算？

江：冇回應，但想講當年我冇唔畀佢阿媽入屋攞嘢，只係胡漢清走咗出去，唔想蒙上唔開門畀奶奶呢個污點。

記：胡生話你想分佢身家？

江：其實係攞child support（子女撫養費），我同佢冇結婚，點會分身家？

記：贍養費傾成點？

江：交晒畀律師。

江希文受訪時激動落淚。

放大圖片

記：胡生哭指當初沒聽母親勸告？

江：唔回應。其實個女好少提爸爸，因為佢晏起身，夜晚返嚟，個女都瞓咗。

記：會否擔心胡漢清取回女兒撫養權？

江：唔擔心，我都冇同佢結婚，佢冇撫養權，我係有sole custody（單獨監護權），但佢可以嘗試去爭，我冇所謂。我問心無愧，只想同個女安靜生活。

記：會唔會返英國？

江：唔會。

記：之前你同胡生都有受傷照曝光？

江：我唔知佢無端端點會有傷口。（此時有人協助她把物件放上車）識胡生到依家，佢從來唔會幫我拎嘢，永遠坐喺車度唔幫手，連男人gentleman都冇。我對佢要求好低，佢肯做少少呢啲嘢已經覺得佢係我老公。

記：覺得佢唔愛你？

江：係唔識愛我，覺得畀家用你，畀屋你住，畀車你，買隻戒指畀你就係幸福，佢唔明女人要咩，我需要關心同體恤，佢都冇做過。

記：咁點解仲想嫁佢？

江：因為好快有BB，未了解佢係咩人。

記：有冇後悔？

江：冇，其實有個女我已經好滿足，好安慰。上天賜個女畀我，如果我哋兩個相處唔到都冇辦法，最想係同個女好好生活落去。我由7月已經開始冇工人，日日都自己湊，其實我唔想影響個女，但都影響咗，不過都好過成日有個人喺屋企講粗口同暴力。

另外，昨晚江希文又發功，在其facebook留言說要帶眼識人：「一位長輩跟我說，遇到這個人真的很大教訓，以後要帶眼識人好。幸好被我一早看穿，有錄音作證，否則我真係死得好慘。」