余文樂撩出軌家輝怕一切盡毀

「七料影帝」張家輝及余文樂為賀歲電影《賭城風雲Ⅱ》造勢，在片中化身刑警的樂仔誓要把飾演罪犯的家輝緝拿歸案。家輝自爆拍攝期間不時與樂仔「爆肚互窒」：「有場戲我扮抽筋同嘔白泡以求脫身，樂仔就話我做犯（人）都咁好戲，應該攞最佳男主角。我即刻爆肚寸佢『下一屆金像獎投番你囉』，但事實上我都好愛護佢嘅！」樂仔聞言就表示外表沉默的家輝是位願意分享的前輩。豈料家輝就順勢揶揄對方「多女」：「女少啲我都唔同佢傾呀，見親靚女都係佢啲舊女，激死我！」樂仔即反擊叫對方嘗試「出軌」識女仔，家輝就乘機隔空冧老婆關詠荷：「我一出軌就炒車毀容，冇晒一切o架喇！」

爆疑有暴力傾向

談到二人合作點滴，樂仔即踢爆家輝疑有暴力傾向：「佢最鍾意破壞同暴力，之前有場爆破戲炸到廠都爛，佢就睇到好享受！」家輝對此笑說：「我對埋身肉搏同槍戰好雀躍，因為現實唔可以（咁做），拍戲就得！其實我囡囡都成日恐嚇我，揭穿咗我食煙就話會殺死我！」

拉埋霆鋒玩離間

談到與周潤發合作，High爆的家輝自稱「零壓力」，更貪玩地向曾傳不和的樂仔及謝霆鋒施「離間計」：「發哥話未來五十年嘅電影圈係霆鋒嘅世界，我就話未來五十年電影我買你（樂仔）！咁都夠你同霆鋒嘈兩年啦，到適當時機我又將你哋拉番一齊，未來五十年你哋夾住嚟做啦！」令樂仔頓時哭笑不得，更直呼「冇咁好氣」！

余文樂

髮型：Ben Yeung

化妝：Jenny Tziong

張家輝

髮型：Jeff Wu

化妝：Midco Chu

場地：E-Max

文：影視組