「亞洲星光大道」出身的亢帥克，早前憑獨特唱功獲黃柏高賞識，簽約成為太陽娛樂旗下歌手，做薛凱琪師弟。亢帥克日前為新歌《擦膠》到電台宣傳，他坦言新歌能鼓勵自己：「公司知我之前有段低潮期，所以揀呢首歌鼓勵我。要我重新開始，好似歌名擦膠咁，擦走唔開心嘅嘢。（以前冇乜工作？）都唔係嘅，嗰時一直想出唱片同拍戲，一直冇咁嘅機會。（亞視仍拖欠員工薪金，可有致電慰問舊同事？）有打電話關心佢哋，希望佢哋快啲渡過難關。亞視快啲解決股東問題、出到糧畀員工。」
