GROUND-ZERO 本地薑由「零」開始

由香港貿易發展局主辦的「香港華麗秀2015」將於明天在香港會議展覽中心舉行，當中邀請了不少設計師來港出席並展示作品，包括本地品牌Ground-Zero的Eri及Philip，二人受邀大感高興：「冇乜試過喺香港做時裝活動，今次好喇，以前騷喺巴黎，好多朋友同傳媒都未必嚟到睇，今次可以睇到，係一個興奮心情，同埋喺香港開騷都係情意結。」他們亦透露除了這次會騷巴黎展示過的系列其中十款，亦有全新五至六個look，令人有新感覺。

香港品牌Ground-Zero由哥哥Eri及弟弟Philip兩兄弟於2003年創立，兩人高中時就愛時裝，Eri做graphic，Philip做時裝及marketing，十年後，由寂寂無聞，到2012年成為本地首個品牌打入巴黎時裝周，是品牌踏進了一大步，能夠吐氣揚眉，Eri說：「當時戰戰兢兢多過喜悅，嗰時未做過fashion show，第一次做騷就去巴黎，幾緊張，國際騷係一個設計師夢寐以求嘅舞台。」

要創立品牌非難事，但要將品牌帶到國際上，付出的努力、背後的辛酸又有幾多人知？Philip表示：「辛酸絕對有，我揸住行李逐家逐戶，問人睇唔睇Ground-Zero，睇唔睇我啲衫，一開頭我哋兩個人乜都做，搬貨送貨點貨，上大陸。我記得有一次好夜去深圳收貨，因為趕住第二日到，所以12點前有幾箱成個電視機咁大嘅箱，佢拎一個，我拎一個，行行下車仔又爛咗，我哋就捧住好多箱嘢，但又夠鐘過關，個陣我哋真係唔知有乜力量令我哋拎得到，最後仲點埋貨，搞掂晒，有好多呢啲事。」或者會問過程中他們有否氣餒？兩人異口同聲及堅定的眼神說：「冇！」

由作曲家到設計師

回想起當時兒時夢想，他們表示兒時熱愛音樂，想做作曲家，Eri說：「細個夢想唔係做設計師，做咗設計之後都唔敢去諗一個咁遙遠嘅夢想，因為真係太遙遠。我嗰陣係想做作曲家，但因為作歌唔夠人好，就走去做番自己學嘅嘢。由細到大我對時裝都有興趣，但就走咗去讀graphic，Philip就去讀fashion，所以就一齊搞啲嘢，做咗Ground-Zero出嚟。」作曲不成，難道想做偶像派做歌手？二人笑說不會，因性格比較低調。Eri反而說自己會做graphic design，而Philip直言可能會寫歌。可能冥冥中就注定兩子是創作之人，只是用不同方式去呈現藝術。

講求默契互補不足

一生人兩兄弟，兩人工作上絕對是互相協調，Philip說：「因為工作上嘈交真係冇乜，大家都有分寸，大家講不同睇法都係想件事好，唔會話鬥氣。」至於兩子的位置無法被取代，缺一不可，Philip表示：「係唔可以取代，好多時光一齊過，默契同信賴係冇人能及，再者Eri嘅graphic好出色。」Philip大讚哥哥Eri，Eri就大爆Philip為人急進，Eri說：「佢衝動、快速，我會住佢，佢有意見同動向就想做，我會話小心啲，睇定啲先。」身為阿哥多數做事會較小心，Philip直言：「有時又小心過頭，叫佢唔好咁小心。」兩個互補不足，難怪默契是無人能及。

為熊黛林接受挑戰

二人在內地真人騷節目《女神的新衣》為熊黛林（Lynn）設計服裝，Philip說：「好臨時，Kim（Lynn經理人）搵我哋話有呢個計劃，問我哋有冇興趣，佢哋好想我哋做，私下認識Lynn，最吸引我哋做係因為係一個好好挑戰，點樣喺幾百人面前講自己時裝理念，點樣一星期內、一日要做好衫，係一個好大嘅磨練，我哋回頭睇係一個好好玩嘅挑戰。」他們最後擊敗對手奪冠，在內地聲名大噪。

採訪：李詠林

攝影：劉智源