楊怡小女人 靠羅仲謙解困

身處娛樂圈這個是非地,藝人走紅往往要面對私生活曝光的代價。入行15年間由路人甲等閒角做起的楊怡,2012年奪無綫視后登上事業高峰,走紅後亦面對緋聞及變臉傳聞,不過楊怡對於一切處之泰然。雖然比羅仲謙大5年,但楊怡在對方身上學到包容及減少執着,她揚言不會為結婚刻意計劃。多年來樣貌被指愈變愈靚,她直認有需要時會考慮微整:「點解唔接受呀!」

女大當嫁 想有Surprise

愛情,從來都只是兩個人的事情,局外人很難明白,身處娛樂圈的鎂光燈下,明星戀人的一言一行都備受關注,私事被搬上枱面作茶餘飯後的話題,情緒智商稍低都難以抵擋輿論壓力。楊怡和羅仲謙自2011年撻着至今,外界普遍認為35歲的楊怡比30歲的謙仔成熟,不過兩個人之間的相處,當然只有自己知。

「可能有啲人會覺得佢細個啲,其實相反,佢係一個諗嘢大個啲嘅人,我有時有煩惱都會搵佢傾。可能男人嘅角度睇嘢會闊啲,學到一種包容同埋冇咁執着。佢哋嘅小心眼係唔會畀你睇到囉,唔會表現嗰種唔鍾意,我哋女仔可能係感情放大行先。Mr. Right?唔知o架!我對於感情一路都係好隨緣咋!可能去到某個階段想做就做,我唔會去plan囉,plan咗反而會失望,有驚喜好啲。」

循序漸進 登上視后

對感情事抱隨緣心態的楊怡,對工作亦然。不少藝人甫入行即目標明確,旨在名成利就,但由無綫訓練班學員躍身成為一線花旦的楊怡,坦言15年前入行初時並無想過會有今時今日的地位。

「冇o架,我都係好隨緣,可能step by step喇,我唔係好care要一步登天,最緊要做得開心,唔好miss咗中間個過程喇,如果一步登天然後冇晒中間啲朋友,我覺得好可惜o架。」

愈變愈索 笑罵由人

除了感情事被擺上枱討論外,楊怡的外貌亦受熱議,也許,這就是走紅的代價。多年來不時被指變臉,她本人倒看得很開,始終懶理旁人目光,更以正面態度看待一切負面評論。淡然面對是非的她,更不諱言有機會接受微整,認為並無不妥!

「係一種必經嘅階段嚟嘅。有陣時同傳媒之間嘅回應好訓練到自己嘅包容、忍耐力。冇乜所謂,最緊要大家舒服開心,靚咗就係好事,因為呢啲嘢唔影響任何人o架嘛。自己嘅蛻變被人認同,係一種成長,冇理由人哋話你愈來愈醜嘅,我都寧願人哋話我愈來愈靚。都要時間去習慣嘅,始終我都係一個平凡人行出嚟,同埋我好少睇雜誌,對我嚟講雜誌個影響唔係好強,所以唔睇就最好,同埋過後大把新聞會蓋過你。Botox同微整係科技嘅進步嚟嘅,點解唔接受呀!你去到某個年紀,你需要嘅時候,冇人願意睇住自己老,女人個個都鍾意靚o架喇。我到咗咁嘅年紀可能我都會。同埋,女為悅己者容,就係咁簡單!」

化身打女 周身傷痛

感情和外貌皆受注目的楊怡,近日因新劇《宦海奇官》而再成網民討論對象。曾膺「飛躍進步女藝員」(2003)、「最佳女配角」(2008)及「最佳女主角」(2012)的楊怡,雖獲封「大滿貫視后」,但依然毫不錫身,懶理舊患搏盡拍打戲。

「劇入面我係一個未出家嘅尼姑,呢套劇有打戲畀我玩吓喇,落山遇到馬國明,做咗佢妹仔,又對佢有傾慕之情,產生好多矛盾位。其實都辛苦o架,因為我好耐冇拍過打戲,條腰同頸都整親,惟有頂硬上,如果真係唔得嘅都有替身。」

後記:講是非無懼色

入行十五年的楊怡,明顯已見慣風浪,一早對是是非非看得雲淡風輕。即使被問及與羅仲謙的緋聞,甚至變臉傳聞,面容亦絲毫沒有變色,依然笑意盈盈地侃侃而談,盡顯大將之風!內心強大的人才能堅定面對外界之紛亂,楊怡正正擁有這種力量。跟她交談,你會感受到其內心的強大,對外界評論看淡,深信自己開心最重要。現在的楊怡事業愛情兩得意,有家人及謙仔在身邊,已令她十分滿足,提起母親和謙仔時,更流露出幸福神情。

口述:楊怡 

筆錄:雲南子 

攝:劉智源 

場地:Top Floor Bar & Grill

化妝及髮型:TY

服裝:Izzue