薛凱琪 紅中魅力
踏入2015年，大家都有個好開始，每年元旦，亦是叱咤樂壇流行榜頒獎禮派成績表的日子，各歌手悉心打扮上台領取成績表，在眾女歌手中，薛凱琪一身中性打扮，入型入格，酒紅色加橙色，望落有星味同有光彩；容祖兒則以公主打扮兼胸前有紅心裝飾，一樣搶鏡；星級造型師郭慶彬亦大讚二人造型夠搶眼，頒獎禮未必要低胸性感搶鏡，最重要是花心思的打扮。
薛凱琪
「中性造型，佢個樣咁女仔，着酒心紅色嘅絲絨西裝褸望落去好突出，橙色加紅色，打破一向冬天黑沉沉嘅感覺，望落有星味同有光彩，其實唔一定要隆重晚裝裙先叫去頒獎禮先好睇，反而呢套中性西裝褸望落去幾瀟灑，着出剛柔並重嘅感覺。」
容祖兒 心形搶眼
「一條公主裙好有大將風範，有壓台感，簡單而隆重，唔使左露右露，一樣搶眼，當然最特別係個心形，配埋頭上花環效果OK，感覺幾夾，有時頭上加啲頭飾反而仲特別，唔使低胸性感先搶鏡。」
王菀之 臃腫論盡
「佢去頒獎禮向以古靈精怪見稱，今次打扮，最怪係金髮小丸子頭，加埋個藍嘴，雖然有創意，可惜感覺差強人意，至於件黑色衫唔係咁啱佢身形，望落去好臃腫，着得佢好論盡，我覺得效果麻麻地，加埋對絲襪令佢腳粗，一啲線條美感都冇。」
吳雨霏 裙腳太長
「我覺得佢條裙幾靚，但佢着唔到有型同高貴味道，裙嘅cutting左拋右拋，有啲臃腫，佢嘅高度撐唔起，嘥咗條裙，同埋裙腳傘位太長over咗，或者改短啲會好啲。佢不嬲打扮都OK，我認為佢今次揀錯衫。」
謝安琪 圓框土氣
「其實裙形係幾靚，我最唔鍾意就係中間前面有個框嘅設計，效果一般，搶到鏡但效果老老土土，佢就咁着呢條裙已經好乾淨利落，同埋顏色特別，髮型化妝唔錯，冇咗中間個框感覺會更好。」
楊千嬅 穩陣嫌悶
「條黑色晚裝裙一般啦，好穩陣，冇乜驚喜，最怪係中門大開，露與唔露之間好尷尬，雖然條裙着得佢條腰修長咗，我覺得去ball啱啲，着去頒獎禮真係沉悶咗，all back髮型令佢面形略大。」
星級造型師郭慶彬（Ricky）的配搭功架深受女星讚賞，是型媽吳君如、「大美人」李嘉欣與「玉女掌門人」周慧敏等的御用造型師，在業界備受肯定。Ricky亦經常被各大品牌誠邀出席米蘭與巴黎時裝周，還會為品牌在尊貴活動上擔任講師，與VIP分享與傳授配搭之道。