陳雅倫徵婚 最緊要夠膊
有人說女人不是天生，而是由環境造就出來的。性感女神陳雅倫自18歲踏入娛樂圈開始，拍電影、出寫真或是做歌手，逐步走出傳奇人生。仍然單身的她坦言想找另一半，首要條件是對方必定「有膊頭」，可以讓她依靠。
人處於不同階段，就會有不同的身份。一向活躍幕前的陳雅倫（Ellen）下一站想挑戰幕後工作：「我踏入娛樂圈好似都大半世，真係好鍾意呢個工作，之後亦唔想放棄。之後除咗幕前嘅演出之外，我仲好想做幕後嘅嘢，例如電影製作或者開電影公司。」難道女神想做女強人？她笑謂：「唔係o架！如果畀我遇上Mr. Right，我一定會願意為佢安定落嚟。」
不屑o靚模文化
單身的Ellen坦言仍在尋找另一半，故藉此刊登「徵婚廣告」：「首先一定想『有膊頭』，可以畀我依靠。其次我唔需要大富大貴，但一定要有經濟基礎。最後，我好欣賞一啲有學識嘅成功男士，希望喺人生後半段可以guide住我。」但最後Ellen亦補充：「其實只要係真心愛我，其他都變得次要。」
身為一代寫真天后的Ellen，有點排斥時下「o靚模文化」：「依家好多o靚模整容整得好犀利，個個都好似樣。我唔贊成整容，尤其咁細個就去整，絕對唔係健康嘅現象。」她亦覺得某些新人的心態有點扭曲：「佢哋依家造新聞嘅性質係互罵、互踩，我真係好唔認同呢種走紅手段。」她指想紅，首先要腳踏實地：「有幾多人可以一出道就紅？No way！」
文：專案組
攝：吳文聰