張繼聰爆肌男神 脫得有價
去年靠「震波猜枚」上位的藝人張繼聰，因大方展現六舊腹肌而吸納女性粉絲，更成為新一代男神！向來豁出去演戲的他，雖未打算「封胸」，惟笑言要「脫」得有價值，不想淪為「脫星」！
去年憑劇集《老表，你好hea！》爆紅的藝人張繼聰（Louis），因大騷腹肌上演「震波猜枚」，令女性粉絲流晒口水，更成功勇奪無綫飛躍進步男藝員獎！
榮升新一代爆肌男神的Louis，透露為演戲可以豁出去：「我唔係嗰種會無啦啦除衫嘅人，但係要為角色服務，角色需要咪做。拍《食為奴》要剃頭就剃頭，個角色要睇多啲歷史知識，咁我咪睇，呢個係演員嘅工作一部分，所以冇乜特別大感覺。」雖然Louis未打算「封胸」，但他笑言要「脫」得有價值，不想淪為「脫星」！他說：「要睇角色同劇情，如果冇特別原因，我唔介意，但係亦都唔想變做脫星。」
未夠班揀角色
演藝學院畢業的Louis可謂「演乜似乜」，但他謙稱只是事前為角色做功課。問到最想挑戰的角色時，他直言「未夠班」揀角色：「我有好多角色都係未試過，講真我覺得每一個角色都難，我暫時未去到嗰種級數，夠膽講『我覺得handle到，唔做喇』，唔係，我覺得全部都handle唔到，所以真係冇諗，每一次嚟到都要做功課。」近年興起北上拍劇搵「人仔」。但Louis因今年檔期排到密麻麻，故會先留港打好基礎。
而張繼聰昨日在將軍澳電視城為無綫劇集《逆戰塘西》拍攝一場落雨追逐戲，張繼聰被雨淋得濕透要曬太陽取暖，他說：「呢套劇成日都要吹風、好凍咁拍攝，試過吹到頭痛。」雖然劇中演警察，但張繼聰卻是被打居多，平均五集就要入一次醫院。11號剛過生日的他更有神秘驚喜，他說：「嗰日喺屋企食完飯慶祝就去開工，都奇怪楊明叫咗我去傾啲好感性嘅嘢，出嚟原來劇組準備咗同我慶祝生日，連我老婆同個仔都嚟咗，好驚喜同感動。」
攝影：劉斌
場地：跑馬地馬場
服裝：Hackett London
文：專案組