許靖韻校園低調 素顏瞞身份

在大學修讀經濟科的歌手許靖韻（Angela），今年就畢業，過去兩、三年她要學業、唱歌兩邊兼顧，她說：「暫時都OK，基本上朝早返學，其實讀Year 2做樂壇新人時比較辛苦，因為新人有很多活動，嗰陣每日瞓得好少，依家反而慣咗、適應咗。」

讚男同學易相處

在大學裏，同學對她歌手身份可有奇異眼光？她笑言：「平時我返學唔會化妝，又戴住近視眼鏡，有啲同學都未必認到我。」她笑說：「有啲同學都會問我做咩，我唔會同佢講話唱歌，話得閒影吓相。」

堅持學業的許靖韻希望學多樣嘢傍身。

許靖韻兩面兼顧，幸獲獎項回報。

Angela坦言因為同學間經常要開會做project，最初同學都驚心她因工作關係而不幫手做，她說：「大家熟咗知道我盡可能每個會都會出席，佢哋就冇嘢，仲好好經常就我，好似上年我仲住宿舍，試過半夜成點喺Lounge開會。」加上老師編組時，她有好多組別大部分是跟男同學合作，她笑說：「男同學相處容易啲、體諒多啲。」

數口精想錢搵錢

Angela表示讀書跟唱歌是兩回事，雖然讀書有壓力，但始終讀書輕鬆得多，相反唱歌這行業就沒有特定答案或模式，所以要自己做好每樣工作，等到好的時機就把握，她說：「公司師兄師姐個個都係我榜樣，做人心態好緊要，每日都要抱住希望、保持樂觀。」

Angela坦言從未想過放棄學業，母親也希望她可完成學士學位，她說：「我自己都幾堅持，覺得又未係好吃力，又可以學多樣嘢。」修讀經濟的她很多數計，她笑言朋友都讚她數口精，她笑說：「我都唔記得當日點解揀呢科，依家學緊股票嘅嘢，將來有機會而又有錢，都想錢搵錢，但暫時未識得去投資。」

文：音樂組　

攝：吳文聰